MT Hagen Eagles i bin go daun wantaim 4-pela poin tasol long raun 3 bilong Digicel Kap kompetisen long las wik Sarere long Sir John Guise Stedium, NCD.

“Dispela em i no asua bilong wanpela pilaia tasol. Em i asua bilong olgeta tim bikos i no gat gutpela straska bilong gem taim ol i bin ranim bal insait long fil,” wanpela pilaia bilong Eagles i tok.

Gulf Isou i bin kisim sans long winim ol Eagles wantaim 16-10 long fultaim.

Long namba wan hap bilong gem ol Eagles i bin orait wankain olsem ol Isou. Tasol sampela asua bilong ol insait long fil i bin bagarapim gem bilong ol na mekim Isou winim ol wantaim bikpela poin.

Ol sapota bilong tupela tim wantaim i bin wankain long gem de tasol Eagles mekim ol sapota bilong ol i go long haus wantaim belat taim Isou mekim ol sapota i amamas bikos ol i winim gem.

Hap taim skoa bilong tupela tim i sanap olsem Isou 10-6 Eagles. Bihain long malolo, tupela resis wankain inap Eagles i bin putim wanpela trai tasol kik i bin abrus na mekim skoa dro 10-10, dispela em i no inapim tingting bilong ol Isou.

Isou sanap strong wantaim difens bilong ol na putim wanpela moa trai wantaim gutpela kik long apim poin bilong ol i go antap long 16-10.

Eagles i tingting long bekim tasol ol i bin asua wantaim kik inap fultaim.

PRK Gulf Isou nau i redi long bungim difending sempian Lae Snax Tigers long dispela wiken long Pot Mosbi. Na Mt Hagen Eagles i bai bungim NCDC POM Vipers long wankain taim.

Jacklyn Kimala i raitim