PRK Mendi Muruks i bin winim 3-pela raun olgeta bilong Digicel Kap na sindaun long namba tu ples bilong leta long las wiken gem.

Long wankain taim em ol difending sempian Lae Snax Tigers i bin autim Rabaul Gurias long Lae wantaim 24-16 poin we i mekim ol Guris go daun long namba tri ples na Muruks go antap long namba tu ples.

Kepten bilong Mendi Muruks Weza Tenza i tok dispela em namba wan taim bilong em long kamap kepten bilong intasiti bihain long em i bin pilai wantaim ol Tigers na i lusim ol.

Em i tok dispela wok bilong kepten em gutpela tasol i gat planti salens i save kamap taim olgeta pilaia i laik toktok wantaim.

“Mi tok tenkyu long kosa bilong mipela Jack Kereme husat i save givim moa taim bilong em long trening mipela long kamap olsem ki pilaia insait long fil,” Tenza i tok.

 “Dispela em namba wan taim bilong mi long kamap kepten olsem na mi laikim olgeta pilaia i mas wanbel wantaim wanpela tingting bilong gem,” em i tok.

Em i tok tenkyu long olgeta mangi long winim 3-pela raun olgeta bilong Digicel Kap, we i mekim ol luk forwat long ol arapela raun bilong sisen.

Ol Muruks i bin winim Vipers wantaim 12-6 poin bikos gem bilong tupela wantaim i tait inap klostu fultaim na Muruks autim Vipers na redi long salenism Wigmen long Lae long dispela wiken.

Jacklyn Kimala i raitim