MASKI sik COVID-19 o coronavirus i pasim ol kain spot long AROB, tingting bilong developim soka, na developim ol pilaia bilong bihaintaim i no stop.

Presiden bilong Bogenvil Futbal Federesen, na tu Sinia Vais President makim Nugini Ailan long PNGFA Justine Helele i kisim pinis wanpela 10 hecta graun long Hutjena long statim wanpela Bogenvil Futbal Skul ov Ekselens.  “Em olsem akedemi,” Mista. Helele i tok.

Mista Helele i tok moa olsem em i laikim olgeta Distrik na ol Konstituensi na tu ol wod long Bogenvil long kirapim ol asosiesen long ranim soka kompitisen long ol hap bilong ol. Na taim ol luksave long ol pilaia wantaim potensel ol i ken salim ol i kam long dispela ples we ol bai kisim moa trenin long pasin bilong soka.

“Bogenvil Futbal Federesen bai toktok wantaim ol praimeri na sekendri skul we i stap klostu long akedemi olsem sapos wanpela pilaia ol salim kam em sumatin, em ken go na skul long wanpela long dispela skul bai em i no ken misim ol skul lesen bilong em,” Mista Helele i tok.

Dispela plan bai helpim soka long Bogenvil long kamap strong. “Sapos ol asosiesen i afiliet wantaim Bogenvil Futbal Federesen ol i ken aplai long kisim sampela helpim bilong ol ikwipmen long PNGFA na FIFA.

Em i tok nau Bogenvil Soka bai gat graun bilong em yet na em ken ranim ol program olsem ol kosing. Em tok dispela akedemi bai i gat ol fesiliti olsem ol haus bilong ol sumatin na ol tisa long slip na kaikai, ol klasrum bilong ranim ol kos na klinik na planti ol samting olsem. Sampela long ol dispela fesiliti bai kamap bihain.

Mista Helele i bilip dispela graun em i kisim bai redi long ol pilai i ken stat long en long Janueri 2021.

Sapos hevi bilong COVID-19 i senis na ples i kamap gut gen ,em laik ranim wanpela Futsal kompetisen bilong ol skul long Tsitalato Konstituensi long Not Bogenvil.

Futsal em wanpela fomat bilong soka gem we i gat long en 5-pela pilaia tasol long wanpela tim na ol i save pilai long sotpela field.

Mista Helele i gat plen tu long statim wanpela kompetisenn bilong ol meri long 2021, bikos long 2023 Australia na Nu Silan bai bung na hostim Women’s World Cup na Helele i laik sampela pilaia bilong Bogenvili i stap insait long PNG Team sapos PNG i kwalifai.

“Na dispela bai i kamap tasol sapos Bogenvil i gat gutpela na strongpela kompetisen,” Helele i tok.

Paul Wagum i raitim