Las wik Sarere, kongrigesen bilong Taurama Be United sios long Mosbi i opim nupela sios bilding bilong ol wantaim wanpela bikpela lotu selebresen.

Joseph Dawai i raitim

SIOS em i ples bilong God i kam na i stap insait long bung bilong ol manmeri na pikinini.

Olsem na long Sarere las wik, kongrigesen bilong Taurama Be United sios na ol narapela kongrigesen memba insait long Mosbi bung long opim nupela sios bilding bilong ol.

Ol i bin stat lotu insait long en long Sande sevis long dispela wik.

Dispela sios bilding em, Mosbi Saut MP, Justin Tkatchenko na NCD Gavana, Powes Parkop i givim mani long wanpela kontrakta long bildim.

Wanpela hetman bilong sios, Kalimu Alama i tok Taurama Be United sios kongrigesen i bin traim long kamapim haus lotu longpela taim na ol i save lotu aninit long wanpela liklik haus ol yet i bin bildim na putim wanpela sait kapa long hait long san na ren.

“Las yia, Mista Tkatchenko i helpim mipela na salim NCD kontrakta (construction), Phonix i kam bildim dispela nupela haus lotu we ol Kristen memba bilong United na sampela arapela sios i ken kam bung long hia na lotu,” em i tok.

Sinia Pasto, Reveren David Lohia i tok, “God i harim prea bilong mipela long wanem dispela kongrigesen em i liklik tumas na ol mani mipela i save bungim i no inap wokim kain haus lotu olsem.”

Rev. Lohia i tok God i save harim prea bilong ol manmeri husat i save kam long em na askim em long sot bilong ol, olsem na nau God Papa strong tumas i givim dispela blesing.

“Dispela haus lotu i soim strong na pawa wantaim marimari bilong God husat i save stap wantaim yumi ol manmeri na pikinini bilong em, na oltaim em i save sambai long helpim yumi long taim yumi save sot o long taim bilong sik na hevi kamap,” em i tok.

Ol kongrigesen i amamas na mekim planti singsing na toktok long apim nem bilong God.

Rev. Lohia i tok taim yumi save slip God i no save slip, taim yumi pilim les God i no save les, oltaim God i save stap na putim ai long yumi ol manmeri na pikinini bilong dispela graun.

PINIS.