Long kamap gutpela lida, yu mas kamap olsem wokboi bilong ol pipel

Joseph Dawai i raitim

PAPUA Niugini wok long painim lida husat i ken kamap olsem wokboi nating.

PNG Kristen Lidas Alaens (PNGCLA) Pasto, Aria Hegame i mekim dispela toktok long wanpela woksap bilong ol meri long Barakau ples, Sentral provins.

Pastaim long dispela woksap, ol i mekim sotpela lotu na em i tokim ol olsem wol nau i wok long painim lida we i ken kamap olsem wokboi husat inap helpim ol pipel.

“Lida em i mas kamap olsem wokboi na ol i save harim toktok bilong ol manmeri bilong em, long dispela kain pasin bai sampela manmeri ken lainim gutpela pasin em i mekim,” Pasto Hegame i tok.

Em i tok dispela kain pasin i ken mekim ol manmeri amamas long wok bung wantaim long olgeta liklik samting em i laik mekim.

Ps Hegame i tok planti taim ol lida i save laik kamap ol bosman na givim oda tumas long ol manmeri olsem na lidasip bilong ol i no save stap longpela taim.

“Olgeta taim wokboi save tingting long stretim rot bilong ol lida bai kam bihain long em, na em i save redim rot bilong ol na em i no save tingting tumas long em yet,” pasto Hegame i tok.

Em i tok wok bilong gavman em God yet i bin putim long helpim ol manmeri long graun olsem na olgeta lida i mas wanbel na wok olsem wokboi bilong bringim sevis i go long ol manmeri.

Em i toktok planti tu long menesmen na long we program i ken helpim ogenesesen long ran gut taim ol lida i save long tingting bilong ol manmeri bilong ol na dispela i ken helpim ol i kamap gutpela na strongpela lida bilong ol manmeri bilong ol.

“Lida em i mas man o meri husat i save long rot, bai bihainim na tu em inap soim rot long ol pipel bilong em,” Pasto Hegame i tok.

PINIS.