Cornelius Momorambi bilong Mindiwi ples long Josepstaal Katolik peris long Midel-Ramu distrik long Madang provins, i bin kisim odinesen long kamap pater bilong Katolik sios long las wik Trinde.

James G. Kila i raitim

WANPELA yangpela man bilong Mindiwi ples long Josepstaal Katolik peris long Midel-Ramu distrik long Madang provins, i bin kisim blessing o odinesen bilong kamap olsem pater bilong Katolik sios long las wik Trinde.

Dispela odinesen bilong Cornelius Momorambi i bin kamap long Holi Spirit haus lotu long Madang taun we planti handret Kristen manmeri na ol pater, sister na ol bruder i bin stap long lukim na amamasim wantaim Santu Misa.

Asbisop bilong Madang Asdaiosis, Asbisop Anton Bal i bin givim blessing long nupela pater Cornelius, husat i wok aninit long Katolik pris oda bilong Daiosisen

Bikpela grup Katolik pater husat i makim ol paris long Madang i bin go lukim dispela odinesen we i kamap.

Wanpela sori samting em ol papamama bilong Pater Cornelius i no bin stap long dispela odinesen bilong wanem tupela i dai pinis.

Pastaim long odinesen, i bin gat naispela ol kala prosesio em ol lain Katolik Kristen manmeri bilong Josephstaal na Megiar peris, we Pater Cornelius i bin mekim pastoral wok bilong em olsem dikon long hap pastaim long em i kisim odinesen olsem pater.

Bihain long odinesen na misa, Pater Cornelius i bin givim stori bilong wokabaut bilong em insait long rot long kamap olsem pater, na i tok tenkyu long lain i sapotim em long wokabaut bilong em.

Pater Cornelius i tok tenkyu long Asbisop bilong Madang long pastaim, Emeritus Asbisop Stephen Reichart, Emiritus Asbisop William Kurtz, na tu Asbisop Anton Bal, husat i go pas long lotu na mekim odinesen.

Em i tok dispela singaut long bihainim rot long kamap pater i bin stap long wanpela liklik ples long Aronis long Megiar peris long Madang.

Bihain long en Cornelius i bin go stap long ples long Mindiwi long Josephstaal peris na i save go pas long ol yangpela long ol komyuniti sevis wok na sapotim ol yut long Sios, na i bin kamap olsem wanpela gutpela rol model long komyuniti.

Namba wan bikpela tok tenkyu bilong Pater Cornelius i go long God long givim stia na helpim em long wokababaut bilong em i go long Rom long kantri Itali long skul long kamap pater anint long oda bilong ol Daiosisen pris.

PINIS.