I gat wari olsem ol manmeri bilong ol narapela kantri save yusim ol yangpela meri na pikinini bilong PNG long mekim mani long ol bisnis bilong ol long kantri.

Joseph Dawai i raitim

BIKPELA wari toktok i kamap long man i go pas long Nesenel Opis bilong Pikinini na Famili sevis, Simon Yanis olsem ol ausait lain o forena i wok long yusim ol liklik pikinini meri long mekim mani.

Mista Yanis i tok planti Asia i wok long i go insait long ol asples bilong Sentral Provins wantaim ol beg mani na grisim ol liklik pikinini meri na kisim ol i kam long stua bilong ol long Mosbi long mekim mani bilong ol.

Em i tok krismas bilong ol dispela liklik pikinini meri em daunbilo tumas na i mak bilong ol i wok mani we ol i sapos long stap wantaim ol papamama na i go long skul.

Olgeta pipel i luksave olsem planti bilong ol dispela kain liklik pikinini meri nau i wok long sanap long ol stua bilong Asia insait long Mosbi.

Dispela em i wanpela bikpela hevi insait long kantri long wanem sapos ol dispela yangpela pikinini meri kisim gut save long skul na stat wok na sapos ol i lusim wok, bai ol inap bungim bikpela wok long bihain taim.   

“Papua Niugini i painim ol saveman na meri tasol dispela pasin bilong laikim mani bagarapim laip bilong planti ol liklik pikinini.

“I gat lo bilong kantri i tok long ol bikpela manmeri i no ken givim hat wok long ol pikinini o fosim ol long wok i no bihainim laik bilong ol,” em i tok.

Mista Yanis i tok narapela samting we i kamapim wanbel namel long ol papamama bilong ol dispela pikinini meri, em i olsem ol Asia i no save long baim ol gut tasol hatwok bilong ol i winim pe bilong ol. Em i tok gavman i mas strongim wok bilong Nesenel Opis bilong Pikinini na Famili long mekim wok painim aut long dispela ol liklik pikinini meri wok nabaut long ol taun na siti insait long PNG.

“PNG i gat lo bilong baim ol wokmanmeri na woka asosiesen long was long ol sitisen bilong en, olsem na yumi olgeta i mas traim long pinisim dispela hevi nogut bai yumi kisim bagarap,”em i tok.