WANPELA Yunaitet Sios Pasto long Sentral provins, Reveren Barua Arua i askim ol manmeri long go bek long sios na Jisas.

Em i tok ol manmeri i wok long lusim bilip bilong ol na i painim amamas bilong dispela graun tasol. Em i mekim dispela tok long soim bel hevi bilong em long taim bilong Krismas na Nu Yia seleberesen. Em i tok Krismas i taim bilong tingim de mama i karim Sevia bilong yumi, Jisas na long bung wantaim famili na amamas. Em i tok em i no lukim dispela kain selebresen long sios bilong em long ples Porebada. Em i mekim dispela tok long taim ol manmeri i dring, pati na amamas na i no go long sios long lotu. Moa yet, em i bin painim hat long holim Krismas lotu bikos long planti nois ol manmeri i mekim ausait long sios. “Manmeri i mas holim strong bilip bilong ol,” Reveren Arua i tok. “Em i bikpela sori olsem ol i lukluk long samting bilong dispela graun long painim amamas.” Long wankain taim, Porebada komyuniti lida Len Soge i tok, planti ol yangpela i pas long spak na kisim smok nogut na bagarapim komyuniti. Em i tok dispela i go bek long wan wan famili taim papamama i no kontrolim ol pikinini bilong ol.Em i tok bilip na gutpela sindaun i stat long famili. “Taim papamama i no skulim gut ol pikinini na gaidim ol, kain hevi bai kamap long komyuniti na sosaiti,” Soge i tok. “Planti hevi i kamap long komyuniti na sosaiti bikos papamama i lusim kontrol long ol pikinini bilong ol.”