Tokim ol man i gat planti mani samting bilong dispela graun long ol i no ken litimapim nem bilong ol yet. Ol i no ken bilip long ol dispela kain samting i save bagaràp kwik.

Nogat. Ol i mas bilip tru long God, em God i save givim yumi planti gutpela samting bilong mekim yumi amamas. 1Timoti 6:17 Insait lo wanpela kantri wanpela bisnisman i stap na em i gat foapela wokman bilong em. Long nuyia taim ol i save kam tok amamas na hepi nuyia long bos bilong ol. Na bosman i save redim wanpela presen long wan wan  bilong ol. Tasol dispela yia em i mekim narakain liklik. Bosman yet i redim tupela presen em baibel na fifti kina. Ol wokman yet inap makim ol i laikim wanem presen, baibel o fifti kina. Ino longtaim na namba wan wokman i kirap na i tok, "Baibel em i wanpela gutpela samting tru. Tasol mi bin ritim baibel planti taim pinis na mi no laikim baibel." Em i tok olsem na em i kisim fifti kina na em i go. Bosman i askim namba tu wokman bai em i laikim wanem presen. Dispela man i bekim tok, "Tru, mi man bilong ritim kain kain buk na buk baibel tu na mi ting  baibel i gat planti gutpela stori i stap. Tasol mi sot long mani nau tasol." Olsem na em tu i kisim 50 kina na i go. Nau namba tri wokman i kam na em i tok, "Mi laikim tru long ritim baibel. Tasol sori tumas. Ai bilong mi i nogut pinis na bai mi hatwok long ritim. Ating mobeta mi kisim mani tasol." Em i tok olsem na em i kisim fifti kina na putim long poket na em i go. Bisnisman i ting bai namba foa wokman i mekim wankain samting. Tasol nogat. Em kam isi tasol na em tok olsem, "Longpela taim tru mama bilong mi i laikim tumas wanpela baibel. Em i laik mipela i ken ritim tok bilong God long haus bilong mipela yet. Sapos mi ting long makim wanpela, orait mi laikim tru long kisim baibel na bai mi ken ritim hap tok bilong God long mama bilong mi long olgeta nait." Bisnisman i givim baibel long em na i tok olsem, "Yu gutpela man tru. Mi amamas tru long disisen bilong yu. Yu mas lukautim gut dispela Baibel, long wanem mani, kago, haus, kar, na olgeta samting i stap insait lo baibel, na lukaut nogut yu lusim dispela bukmak." Dispela foapela wokman i lusim haus bilong bosman na olgeta wantaim i wakabaut long rot igo bek long ples bilong ol. Nau wanpela i tok, "Ating dispela tok long yu no ken lusim bukmak long baibel bilong yu igat wanem mining, a" Dispela yanpela man i sekim na i painim bukmak i stap long baibel bilong en. Em i kirap nogut tru. Em i lukim handred kina i stap hait long dispela baibel bosman i bin givim em. Tripela arapela wokman i lukim dispela na ol i sori long ol yet na ol i tingting planti. Tasol nau ol i let pinis. Ol i no inap makim arapela presen gen. Nogat. Ol i bin makim Fifti kina pinis. Wankain samting bai i kamap long olgeta man i save wok long bungim mani na kago bilong dispela graun, na i no save tingim God na tok bilong em.  Stori i ken skulim yumi, nau yumi stap laip yet long dispela graun. Yumi makim buk baibel o yumi makim mani, Sapos yumi no makim baibel na i go lo mani. Em i  olsem ol dog i pait nating long ol bun bilong mit. Buk baibel i laik skulim yumi olsem,  "Namba wan samting yupela i mas mekim i olsem. Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta samting tu long yupela." Matyu 6:33. Na Baibel tu i tok, Pasin bilong laikim tumas mani em i as bilong olgeta pasin nogut. 1Timoti 6: 10a.

Jerry Tupex i raitim