OL Rosari Sista kongrigesen long Wewak Katolik Daiosis, Is Sepik Provins i holim Jeneral Asembli (kibung) bilong ol long dispela wik.

Wan wan yia, ol sista i save holim dispela kain kibung. Dispela ol kibung ol sista i save toktok long ol ajenda olsem votim bikpela superia bilong ol, ol eksektiv olsem vais provinsal, tresera na seketeri. Ol bai toktok long ol sekula ministri ol i save mekim ausait long relijus ministri bilong ol olsem wok tisa na nes na ol arapela wok long komyuniti. Wantok Niuspepa i no kisim het tok bilong dispela kibung tasol i bilip ol bai bihainim karisim o bikpela singaut bilong sapotim bisop na ol pater long skruim Tok bilong Bikpela na lainim manmeri long pasin bilong Kristen laip. Las mun kongrigesen i bing amamasim 70-yia anivesari bilong ol. Kardinal Sir John Ribat i bin bung wantaim Wewak Daiosis Bisop Joseph Roszynski, SVD, na ol pater, bruder, sista na lokal manmeri long amamasim dispela de wantaim ol sista. Rosary Sista kongrigesen em lain grup bilong ol sista em “Flying Bishop” Asbisop Leo Arkfeld, SVD, i bin kamapim. Pastaim long Rosari i kamap Bisop Leo i bin askim ol Mercy Sista kongrigesen long Brisben, Australia long go long Wewak na helpim long autim tok bilong God na skulim manmeri long tok na pasin bilong Kristen laip. Bihain long dispela Asbisop Leo i tok, wanpela taim ol sista bilong narapela kantri bai go bek long kantri bilong ol na em i mas kamapim wanpela lokal relijus grup we i save long lokal komyuniti na bai stap oltaim wantaim ol. Long dispela as em i kirapim Rosary Sista kongrigesen. I gat moa long 30 sista i stap insait long grup nau. Arere long wok bilong skulim manmeri long tok bilong God, ol sista i kisim trening tu long kamap tisa na nes na givim sevis long edukesen na helt sekta na ol arapela sekta we i gat nid long ol. Dispela i daiosisen sista grup na olsem ol i save wok long Wewak Daiosis. Sapos i gat nid o singaut long narapela daiosis long kantri o long wol, ol i bai go.