IVANJELIKAL Luteran Sios (ELC) PNG i bin holim dediketet sevis long redi long holim 33 Sinot bung bilong em long Kirap Bek Luteran sios long las wik Sande.

Presiden bilong host komiti bilong Papua Distrik, Sumasy Singin i tok distrik i redi pinis long holim sinot we bai stat long Sande 9 Janueri, 2022 na i go pinis long long neks wik Sarere long 15 Janueri, 2022. Singin i tok dispela sinot i save kamap bihain long tupela yia. Em i tok las sinot i bin kamap long Boana ELC distrik long Nawae, Morobe Provins. Bihain long dispela Sinot ol distrik bai vot long husat bai holim 34 Sinot kibung. “Sinot em bikpela kibung bilong sios we olgeta kongrigesen i bringim polisi na ol distrik i bringim ajenda bilong ol long na tokaut long ol,” Singin i tok. “Ol distrik delegesen memba bai vot long dispela ol ajenda na ol wok we bai kamap long sios long narapela tupela yia. Singin i tok sios long lukluk long kamapim K1 milien long holim dispela sinot. Em i tok wan wan kongregesen bai putim moa long K50,000. Siaman bilong Ogenaising Komiti, Sumasy Sigin i tok ol bai bihainim Nupela Pasin bilong coronavirus (COVID-19) na holim dispela kibung. Em i tok komiti i lukluk long moa long 800 delegesen we em i hop wan wan ol 17 ELC distrik bai salim 50 maus man na meri bilong ol tasol i tok dispela namba i ken go antap moa long 1000 taim ol i kisim sampela ol obseva i kam long ovasis olsem Australia na Jemeni long bung. Pastaim long dispela het bisop bilong ELC PNG Reveren Jack Urame, Sinot Ogenaising Komiti i bin strongim tingting bilong Polis Komisina na COVID-19 Nesenel Pandemik Rispons Kontrola, David Manning olsem komiti bai bihainim olgeta lo bilong COVID-19 em manmeri i mas bihainim long sinot i ken kamap gut. Em i tok sios i amamas long bekim bilong Kontrola na i redi long holim sinot. Em i tok het tok bilong sinot em “… Mi wantaim famili bilong mi, mipela bai i lotu long Bikpela tasol,” (Joshua 24: 15). “Taim mipela i bihainim olgeta rot bilong kamap bilong COVID-19, mipela bai i no inap long pasim stap bilong em,” Reveren Urame i tok. “COVID-19 bai stap tasol mipela i mas bihainim ol rot olsem em i no kalap long wanpela man o meri i go long narapela na bagarapim ol.” Komiti i lukluk long mani mak bilong K1.3 milien long holim bung na dispela mani em ol distrik bilong sios bai i mas kamapim. Vais Siaman bilong Sinot, Kingston Alu i tok mameri i mas bilip long Jisas long helpim ol long stap gut. “Wok redi bilong kamapim Sinot bai go het long ol i mas redim ol song, singsing, musik na stretim ripot bilong ol 17 distrik bilong ELC-PNG,” Alu i tok. “Long nau yet olgeta bung lotu bilong sios i stop tasol i mas i gat ol famili lotu na ol felosip long wan wan haus na pre long Jisas Krais long helpim ol pipel.”