SIOS i statim Adven sisen. Las Sande em i Krais i King pestode na em i taim tu we Katolik Sios na ol arapela sios i bihainim kalenda bilong lotu long statim dispela sisen.

Adven i taim bilong bilip manmeri i wet, redi na gat hop long wanpela samting, Apostolik Nunsio Asbisop Fermin Emilio Sosa Rodriguez i tok. Em i tok Adven i min “kam” na sios i makim dispela taim long manmeri i redim ol yet long amamasim de Mama i karim Jisas. Em i tok em taim bilong yumi i mas mekim gut long wanpela na narapela. Em i tok manmeri i no ken lusim mining bilong Adven na ol arapela taim Sios i makim long tingim laip bilong Jisas. Gutnius bilong las Sande i tokaut long Jisas i King taim Pailot i askim Jisas sapos em i king (Jon 18: 33-38). Asbisop Rodriguez i tok bikos Jisas king bilong heven na graun, adven i taim manmeri i mas redim ol yet long welkamim em. Em i tok Jisas i no bin kam olsem ol manmeri bilong Israel i wetim em long kam tasol olsem wanpela man nating. Em i tok Jisas em dispela king husat bai mekim fri ol Israel. Tasol long taim em i kam, ol Juda man i no luksave long em. Ol i lukluk long kain king bilong graun husat bai kam wantaim bikpela ami na strong. Tasol king em God i tok em king bilong pinisim dai na long bringim ol sol i go bek long God. Em dispela king bilong Spirit na i no bilong bodi. “Em i taim yumi, famili na komyuniti wantaim i wet long kam bilong em long laip bilong yumi,”  Asbisop Rodriguez i tok. “Mipela i mas redim tingting na lewa bilong yumi long welkamim Jisas i Sevia bilong yumi.  “Yumi ken mekim gut taim yumi givim samting long wanpela na narapela tasol yumi askim yumi yet sapos yumi inap givim spes long laip bilong yumi long welkamim Jisas i kam insait long laip bilong yumi. “Bai i gat ples long laip bilong yumi long larim Jisas Krais i kam insait o nogat?” Asbisop Rodriguez i tok taim yumi amamas long kam bilong Bikpela Jisas, yumi tingim tu kain laip yumi i bin bungim long dispela yia.

Em i tok 2021 i bin salensing yia bikos long kamap bilong coronavirus (COVID-19).