WANPELA polisman i singaut i go long wanpela boi i stilim bilum bilong wanpela mama. “Hei! yu sanap long hap!”Boi i lukim polisman na i ranawe kwik tru i go insait long ol planti manmeri i stap long en.

“Holim dispela boi, em i stilim bilum!” Polisman i singaut olsem na i ran bihainim em. Ol planti yanpela man na meri i sanap lukluk tasol na ino mekim wanpela samting. Ol i lukluk tasol i stap na stil boi i ranawe i go hait long baksait long wanpela stoa. Kwik taim tru narapela polisman i kamap long dispela kona na i holim dispela boi. Ol i bringim em i go insait long polis stesin. Dispela polisman i bin lukim em pastaim i belhat moa. Em i kisim raba stik na i paitim dispela boi long as, lek na baksait bilong en. Sori, stil boi i kisim bikpela pen long bodi bilong en. Ol i lokim em long wanpela rum na ol polisman i stretim tok long ol bai i mekim wanem long dispela stil boi. Namel long ol polisman, i gat wanpela em i save gut long dispela boi. Tupela i bilong wanpela haus lain. Em i wanpela senia polis opisa. Dispela senia opisa i tok ol ino mas putim em long sel. Ol i mas paitim em gen na givim strongpela tok na salim em igo aut. Ol arapela polisman ino wanbel long dispela disien i bin kamap. Tasol ol i mekim olsem dispela senia opisa i tok na ol i salim em i go aut. Dispela polisman i bin lukim em i stil na i ranim em i no amamas long dispela disisen i bin kamap. Em i pilim hevi stret na i tokim tupela arapela polisman olsem, “Wanem taim bai yumi ol polisman i mekim stret wok bilong yumi na pinis wantaim ol wantok na save pes sistem bilong mekim disisen? Yumi no stap tru long promis yumi bin mekim long taim yumi kisim trening long kamap polisman. Yumi no helpim kantri bilong yumi na tu yumi no helpim wantok bilong yumi.” Dispela kain pasin i kamap bikpela long kantri bilong yumi PNG. Yumi stap long wanem poisen long wok ples, lida bilong kantri o komyuniti. God yet i blesim yumi long kamap long dispela mak. God i makim yumi na givim yumi gutpela tingting long mekim dispela wok wantaim bel isi wantaim stretpela pasin. Tasol ol arapela samting bilong dispela graun i save pulim tingting bilong yumi na yumi lusim gutpela tingting God i bin blesim yumi long en. God i was na i wet long lukim wanem em i bin blesim yumi, mas kamap ples klia na dispela i givim glori  na biknem long God. Planti wantok sistem i wok long kamap long wan wan level bilong yumi. Tasol long ai bilong God i nogat wantok sistem, em bai skelim yumi long wankain skel tasol, yumi dai tu bai i wankain. Buk baibel i tok, “God i save skelim olgeta manmeri long wankain pasin tasol, maski ol i bilong wanem lain.” Rom 2:11. Na yumi laik lukim tu arapela baibel tok em aposel Pol i tok long ol bosman. Na yupela ol bosman, yupela tu i mas mekim gutpela pasin long ol wokboi nating bilong yupela. Yupela i mas lusim pasim bilong pretim ol. Bikpela i stap long Heven, em i Bikpela bilong yupela na bilong ol tu, na em i save skelim pasin bilong olgeta manmeri long wankain pasin tasol. Efesas 6:9 Tingim gut, God i no marimari long Pris Eli wantaim ol pikinini ilong en. Ol pikinini i bagarapim tempel bilong God na God i kilim olgeta i dai. 1 Samuel 3.

Jerry Tupex i raitim