LONG taim nogut na gutpela taim i gat pawa long promis bilong diwai kros bilong Jisas Kraist na no gat narapela god bai inap winim marimari bilong God i stap laip long heven.

I gat faivpela wik tasol i stap nau long sinot bilong Evangelikal Luteran Sios bilong Papua Niugini (ELCPNG) i kamap long Pot Mosbi long 9 i go inap 15 Janueri 2021. Deputi Siaman bilong sinot komiti, Kingston Alu i tok ples bilong bung em ol i kisim pinis long Sir John Guise Stedium na ol i baim pinis tripela domitori o haus bilong slip long Yunivesiti ov Papua Niugini (UPNG) long K300, 000. “UPNG i givim wanpela moa fri domitori na mes bilong kuk na kaikai wantaim 8-pela wokman na meri long kukim kaikai long dispela bung,” em i tok. Mosbi Not-Is seket i helpim wantaim mani na kaikai olsem 16 pik na 1000 kakaruk. Ol stua kaikai na sampela gaden kaikai bai ol i kisim kam klostu long taim bilong bung. Ol Luteran sios long Mosbi tu i wok long bungim mani na plen long kisim kontena kabis na kaukau long Hagen i kam daun long Mosbi. Pandemik Kontrola David Manning i askim ol memba bilong ELCPNG husat i tingting long kam long dispela bung long bihainim sefti protokol long abrusim COVID-19. Manning i tok pasin bilong harim tok na bihainim Nupela Pasin bai daunim COVID-19 pandemik. Em i tok Nesenel Pandemik Kontrol opis bai givim wanpela kontena senitaisa na pes mask wantaim kar na sampela polisman long lukautim na wok wantaim ol komiti bilong sinot. Mista Alu i tok wok redi bilong sinot i go het na planti ol Kristen i wok long helpim ol long sapotim long kamapim dispela bung bilong sios.

Joseph Dawai i raitim