Wanpela man i stap long bot klostu long nambis na em i gat wok long kisim ol pis. Tasol em i no amamas long ol pis em i kisim. Oltaim em i sikirap tru long painim wanpela traipela pis.

De na nait em i save go long solwara long inapim laik na hangre bilong em long kisim wanpela bikpela pis. Wanpela taim, tru tumas, wanpela traipela pis i kam hang kamap long huk bilong em. Em i amamas tru na pulim igo long nambis. Tasol taim em i pulim pis na ran yet wantaim bot, wanpela sak i kam na kaikai traipela pis bilong em. Taim dispela man i kam kamap long nambis, ol bun bilong pis tasol i stap long huk na mit na gris bilong pis, sak i kaikai pinis. Sampela taim yumi manmeri i laik bihainim laik na tingting bilong bodi bilong yumi. Yumi ting, sapos yumi gat ol dispela ol samting, bai yumi amamas na stap bel isi. Tasol dispela laik na tingting i no tru. Planti ol manmeri long kantri bilong yumi Papua Nuigini i no amamas long ol samting ol i gat pinis. God i bin blesim ol pinis wantaim mani, haus kapa, ka na tu wanpela posisen insait long wanpela kampani, tasol dispela ol samting i no inap yet long ol. De na nait ol i stap na tingting i wok yet long kisim moa na moa samting. Sampela ol gutpela Kristen man na meri tu i bin kisim blesing bilong God. Tasol dispela ol manmeri ino save tok olsem, “ Em inap long mi,” na ol i wok long painim moa yet. Taim traim i kamap long ol, ol tu i no bin sanap strong long bilip na wantu ol i lusilm bilip pinis. Em i olsem “bun bilong pis” tasol i stap long huk bilong ol na ino save kamap long mak ol i ting long em. Baibel i tok. “Yumi save, taim mama i karim yumi na yumi kamap long graun, yumi no bin karim wanpela samting i kam. Na taim yumi lusim graun yumi bai i no inap karim wanpela samting i go. Tasol sapos yumi gat kaikai na laplap samting, orait yumi ken tok, “Em inap long mi.” 1 Timoti 6:7-8 Yumi ken prea olsem wanpela man i prea insait long baibel. “God, mi laik askim yu long tupela samting, na mi laik bai yu mas givim mi. Long taim mi stap long graun yu ken helpim mi ken givim baksait long ol kain pasin bilong giaman, na yu no ken larim mi kamap maniman o rabisman. Nogat. Yu ken givim mi kaikai inap long skel bilong mi. Nogut mi gat planti samting tumas na mi givim baksait long yu, na mi tok, “Bikpela em i husat? Na nogut mi kamap rabisman na mi stilim planti samting na mi daunim nem bilong yu, God bilong mi.” Gutpela Sindaun 30:7-9 Yumi ken i gat wankain tingting olsem Pol  i bin gat. “Maski mi stap rabis tru o mi gat planti samting, mi save stap isi tasol. Mi save pinis long pasin bilong stap isi, maski mi gat planti kaikai o mi stap hangre, na maski mi gat planti samting o mi sot long ol samting. Olgeta kain samting i ken kamap long mi, na mi save stap isi yet na belgut tasol.” Filipai 4:12 Taim olgeta pikinini bilong Job i dai na olgeta abus bilong em tu i pinis, em i no toktok planti long ol dispela samting. Nogat. Em i amamas long em i stap laip. Tasol Judas i narapela kain liklik. Em i tingting long kisim moa na em i lusim laip.

Jerry Tupex i raitim