PLANTI ol bilip manmeri i no amamas long ol lo bilong sik coronavirus (COVID-19) em Nesenel Kontrol Senta (NCC) i kamapim.

Ol i tok dispela lo i wok long bagarapim bilip bilong ol. Wanpela bilong dispela ol bilip manmeri em Agatha Sabai husat i stap long Taurama Foodland na i save go lotu long Don Bosco Teknolojikal Institut long Is Boroko. Em i no bin save olsem i bin gat lo i pasim ol manmeri long go lotu na em i bin go long lotu long las Sande na i lukim ol sekyuriti i pasim geit. Toksave long geit i tok olsem Asbisop i bihainim NCC COVID-19 lo na stopim bikpela namba bilong bung na lotu. “Dispela sik i pasim planti ol gutpela samting long kamap,” Sabaia i tok. “Kain lo i daunim spirit bilong ol manmeri long lotu. “Em i gutpela long gavman i kamapim ol lo tasol long kamapim lo long pasim ol lotu olgeta i no gutpela.” Sabaia i tok moa gutpela olsem ol gavman i mas kamapim ol lo we i larim 100 manmeri i bihainim ol COVID-19 lo na go long lotu olsem ol i gat spes bilong 1.5 mita o 2 mita longwe long narapela na i putim pes mask. Polis Komisina na Nesenel Pandemik Kontrola, David Manning long 30 Septemba i givim oda long moa long 20 manmeri i no ken bung long wanpela hap, na dispela i karamapim tu ol bung bilong lotu. Dispela oda i stap wanpela mun na bai pinis long 30 Oktoba. Bihainim dispela oda Pot Mosbi Asdaiosis i givim toksave tu olsem no gat bung lotu long ol haus lotu long daiosis. Kardinal Sir John Ribat, Asbisop bilong Pot Mosbi i salim wanpela pas i tok, “Mi laik tok gen long yumi wantaim rispek na pasin bilong laikim olsem yumi i mas tingting gut long was long yumi yet na ol arapela long yumi i no ken kisim COVID-19. “Mipela i gat namba bilong dispela sik i wok long kamap bikpela long Nesenel Kapital Distrik na ol arapela hap bilong kantri,” Kardinal Ribat i tok. “Olsem hap bilong wok bilong mipela, mi laik tok strong gen long yumi i mas go het long mekim tupela prea long strongim bilip bilong yumi. “Dispela ol prea em long Singaut i go long taim bilong sik na prea i go long Santu Michael, Was Angelo bilong Papua Niugini.” Sir John i tok Asdaiosis i sapotim wok bilong Gavman long daunim COVID-19 na olsem em i askim ol pater long no ken holim ol bung lotu we moa long 20 manmeri i ken kamap. Em i tok ol pater i mas stap long hap bilong ol yet na holim ol lotu na tingim ol manmeri long lotu na prea bilong ol. Tasol em i tok long 9 klok long olgeta Sande, em i save wokim ol lotu we manmeri i ken bihainim long NBC televisen, NBC Redio na Redio Maria. Em i askim ol manmeri long joinim em long dispela taim bilong Misa. Em i tingim olgeta bilip manmeri long ol lotu na prea bilong em.