KOMYUNIKESEN i bikpela samting long wanpela inap save na strongim bilip. Pater Harris Pakkam, SDB, member bilong Sekta ov Komyunikesen long Rom,

Itali i bin mekim dispela tok long ol memba bilong Sosel Komunikesen Dipatmen Skul ov Fomesen bilong ol Is Esia Osenia (EAO) rijon long wanpela Zoom bung ol i mekim long 29 Septemba, 2021. Ol memba bilong EAO i kisim ol kantri olsem Indonesia, Filipins, Pakistan, Hong Kong, Vietnam, Is Timor, Myanmar, Mongolia, Japan, Korea, Australia, Thailand, Cambodia, Papua Niugini na Solomon Ailan. Moa long 45 ol memba bilong EAO i bin stap long dispela Zoom miting na serim tingting na toktok. Bisop Otto Separy bilong Bereina Daiosis na Pater Ambrose Pereira, SDB, i makim Papua Niugini na stap long dispela Zoom konprens. Pater Pakkam i tok sapos no gat pasin bilong komyunikesen, no gat luksave, wok divelopmen na gutpela sindaun i ken kamap. Em i strongim toktok bilong Pop Francis olsem long Katolik Sios i gro, i mas i gat gutpela komyunikesen namel long manmeri na ol ogenaisesen. Em i tok Pop Francis i tok em i no wok bilong ol bisop, ol relijus o ol sios lida tasol long autim Tok bilong God tasol long olgeta manmeri husat i kisim baptais na kamap Kristen. Em i tok olgeta i mas bungim wantaim, serim tingting na toktok long strongim bilip.

Pop Francis i askim manmeri long bihainim tripela rot bilong yusim komyunikesen long serim Tok bilong God:

• Disentrelaisesen we i min olgeta Kristen manmeri, sapos yu relijus o nogat i gat wok bilong harim, kisim na autim Tok bilong God. Dispela i min inkalsuresen – tanim tok na givim piksa long lokal wei we manmeri i ken save gut long Tok bilong God;
• Givim luksave na bungim olgeta manmeri maski long wanem ples ol i kam long em, tokples na kalsa ol i gat long em, serim tok na larim ol yet i mekim wok long autim Tok bilong God; na
• Givim taim long harim ol narapela na serim amamas na salens ol i gat long em.