GOD i givim lo long wokman bilong em Moses tasol Pikinini bilong God i kisim marimari na tok tru i kam daun long helpim olgeta manmeri.

Dispela toktok em Pasto John Bouraga bilong JB Ministri i bin mekim long wanpela wik kruseid long Gaire viles long Sentral provins. Pasto John i tok lo God i bin givim long wokman bilongem Moses em long mekim ol manmeri long luksave long sin bilong ol tasol marimari bilong God em i bilong lusim olgeta sin bilong yumi. “God i yusim Moses long givim lo long yumi tasol marimari na tok tru yet i bin kamap man na em i bin kam daun long graun olsem man,” em i tok. Aninit long lo God i save stretpela pasin bilong yumi long soim yumi ol sin yumi save mekim (Matyu 22: 37) tasol long marimari na tok tru God i mekim yumi ol man i kamap stretpela man long ai bilong em (Rom 4:6).  Long olpela testamen Moses bin tanim wara kamap blut (Eksodas 7: 1721) tasol long nupela kontrak Jisas bin tanim wara kamap naispela wain bilong drink (Jon 2: 1-10). Pasto John i tok lo i mekim man long tok sori pastaim long em i ken kisim blessing tasol marimari i save setim man i go fri pastaim long em i kisim blessing (Rom 2:4). Baibel i tokim yumi long Jon 8:10-11, 32 olsem lo i bin painim aut olsem wanpela meri bin mekim sin tasol long marimari bilong Jisas lo i nogat strong. Lo i no inap sevim man olsem tasol Jon 3:16 i tokim yumi olsem Jisas tasol bin sevim yumi pinis. Taim Moses i kisim lo long Mauten Sanai na kam daun graun i bin op na 3, 000 manmeri bin dai bikos ol i bin sakim tok bilong God tasol long taim Holi Spirit i kam daun long taim bilong pentikos 3, 000 manmeri i bin kisim bek laip.    Pasto John i tok lo i givim oda na mak bilong man i ken bihainim na sapos man i no bihainim orait lo bai givim mekim save long ol. Tasol Baibel i tok klia moa long Rom 10: 4 olsem marimari na sori bilong God i nogat mak na pinis bilong em na em i winim strong bilong sin.

Joseph Dawai i raitim