Paulus Tali i raitim KARKAR distrik long Madang Provins bai holim 2023 namba 15 Ivanjelikal Luteran Sios (ELC) PNG kibung.

Dispela disisen i kamap bihain long ol pasto i pinisim 2021 namba 14 ELC pasto kibung long Mumeng, Morobe provins long pinis bilong las mun. Moa long 100 pasto bilong ELC long kantri i bin kamap long dispela bung. ELC PNG Deputi Siaman bilong ol pasto konprens Teng Tengduwi i tok tenkyu long ol pasto long kamap long bung. Em i makim maus bilong Hetman bilong ELC PNG Reveren Jack Urame na i tok God i singautim ol pasto long telimautim Gutnius. Yangpela Timoti i mas mekim dispela wok bilong God, olsem Aposel Paul i tokim em. Olsem na yumi ol pasto tu i mas bihainim dispela tok long autim Gutnius bilong Krais Jisas i go long olgeta pipel.” Ol pasto bilong 17 distrik bilong ELC-PNG i kam bung long 2-pela yia konprens bilong ol long toktok long wok Gutnius insait long Papua Niugini. Pasto Tengduwi i askim ol pasto olsem ol i mas sanap strong insait long wok bilong ol, long autim Tok bilong God long hap ol i wok long en na lukautim gut sios bilong Jisas Krais.

“Wok bilong yupela ol pasto em long strongim bilip bilong olgeta pipel. Taim yumi i autim Gutnius bilong God Bikpela, wankain olsem Aposel Paul i bin givim stia i go long yangpela wokman, Timoti, yumi mas sanap strong long dispela tok yumi autim. “Tok bilong God i singautim yumi long lukim kala, pawa na glori bilong em i wok long laip bilong ol pipel.” Em i tok i gat tripela bikpela as tok ol pasto i mas bihainim long wok bilong ol.

Ol bikpela as tingting em:

• Pasto i mas pas wantaim Jisas Krais   na stap gutpela wok man bilong sios;
• Pasto i mas redi long wanem hap em het man bilong sios i makim em long go na mekim wok; na
• Pasto i mas skelim gut ol tok bipo long em i autim tok. Em i tok God yet bai  go pas long ol tingting  n a wok bilong yumi.

Tupela Memba bilong Palamen i bin stap long dispela bung em Memba bilong Wau/Bulolo, Sam Basil na Memba bilong Sumkar, Chris Nangoi. Basil i bin helpim tu wantaim mani long kamapim dispela konprens. Nangoi i makim ELC Karkar distrik na givim tok orait long holim 2023 pasto konprens.