LONG kamap na stap lida, em i bikpela salens long taim i gat planti hevi bilong lo na oda, moa long dispela taim bilong sik coronavirus (COVID-19).

Insait long dispela ol salens, wan wan ples long kantri i narapela long arapela. Hela provins i wanpela hatpela ples long stap lida long dispela taim. Tasol maski long dispela, wanpela Yunaitet Sios bisop i tok, insait long dispela ol salens, em i gutpela long autim tok bilong Bikpela namel long ol bilip manmeri. Bisop Agabu Entonio i bisop bilong Hela Yunaitet Sios Distrik na i wok sampela yia nau long dispela distrik. Long strongpela bilip na gutpela lukaut bilong em, sios i bin holim Enuel Jeneral Asembli bilong em long Hela long las yia. Wanpela Yunaitet Sios bilipman, Kaigabu Kamnaya long post long Facebook na i tok Reveren Agabu i no go long wanpela bikpela skul tasol bikos long bilip bilong em, Bikpela i strongim em long kamap lida bilong ol pipel bilong em. “Reveren Agabu i piksa bilong bilip, hatwok na wokman bilong ol arapela,” Kamnaya i tok long Facebook pes. “Em i mekim ol samting i stret long ai bilong Bikpela. “Em i soim pasin bilong wanem samting i bilip manmeri.” Kamnaya i tok bikos long bilip na wok bilong em, sios i bin inap long holim jeneral asembli kibung long Tari, Hela long las yia Novemba. Em i tok sios i mas gat dispela ol kain lida we bai lukim sios i sanap strong na strongim bilip bilong ol manmeri. Em i tok Reveren Agabu i bilong Kiriwina long Milen Be Provins na i wanpela Gret 6 skul liva tasol em i kamap sios lida bikos long bilip, pre na wok bilong em. Em i go long Rarongo Tiolojikal Koles long Rabaul, Is Nu Briten long 1990s we em i skul long kamap pasto. Dispela i lukim em i kamap pasto na i wok inap long nau em i kisim odinesen olsem bisop bilong sios. Narapela sios bilip meri, Susan Setae i rait long Facebook pes na pre olsem Bikpela i mas go pas long sios na lida bilong em olsem moa kain sios lida i mas kamap.