PLANTI manmeri long not kos rot (NCR) long Madang provins i bin guria long las wik Fonde taim ol Katolik manmeri na ol yut bilong Madang i wokabaut long prosesio stat long Rivo ples i go olgeta long Alexishafen.

Dispela prosesio i kamap long taim bilong Ripentens De we Gavman i makim olsem wanpela de long luksave long ol pekato bilong yumi na tok sori long asua yumi wokim long laip bilong yumi. Long Madang dispela i lukim ol Katolik Kristen manmeri i wokabaut na prea na singsing lotu na beten korona Mama Maria na wokabaut long luksave long dispela de. Dispela prosesio i lukim ol Katolik yut i karim ol plak we i soim ol peris ol i kam long ol. Planti yangpela i singsing na wokabaut na sampela i prea na bungim nek wantaim na wokabaut wantaim long dispela prosesio. Wantok Niuspepa i bin bungim dispela ol

lain long ring-rot long ples Malmal long Rivo taim ol i wokabaut long rot i go. Asisten Katolik Edukesen Seketeri long Madang Daiosis, Otto Khon i tok taim planti ol yangpela i givim taim bilong ol long wok bilong sios dispela bai helpim komyuniti long lukim senis na bai i gat gutpela sindaun na belisi stap long komyuniti. Em i tok tude planti ol lo na oda hevi i kamap bikos ol yangpela manmeri i no harim tok na lotu olsem komyuniti i ken stap gut. Ol i ken luksave long gutpela bilong Tok bilong God taim ol i joinim ol Kristen yut ogenaisesin long stiaim wokabaut bilong ol. Taim kain pasin i stap dispela bai lukim gutpela sindaun na pasin bilong bel-isi na amamas stap long komyuniti. Khon i tok planti ol lain yangpela manmeri husat i wokbaut long dispela prosesio i makim ol Katolik peris bilong ol insait long Madang Asdaiosis.

James G. Kila i raitim