Dispela man i bin stap wantaim Jisas bilong Nasaret. Matyu 26:71 Jisas i go long heven pinis, na planti yia bihain ol Kristen long wanpela bikpela kantri na ol arapela liklik ples insait long dispela kantri i karim hevi long nem bilong Jisas.

Long sampela hap gavman i tok tambu long autim gutnius bilong Jisas. Ol i kalabusim planti Kristen, na planti ol i kilim dai. Long dispela taim insait long wanpela taun bilong ol, ol i wokim wanpela bikpela ples bilong pilai spots. Namba wan gavman i mekim wanpela promis olsem long man i bosim dispela wok. “Dispela ples bilong pilai yu mekim i kamap naispela na mi laikim, orait bai mi mekim bikpela pati, na olgeta manmeri bai bung na givim biknem long yu.” Man i bosim dispela wok i taitim bun tru na i wok strong long mekim samting i kamap naispela moa yet. Wok pinis na ol i laik opim dispela ples bilong pilai. Planti manmeri i kam na bung na namba wan gavman i tokaut long ol olsem, “Tude yumi bung hia long opim dispela bikpela ples bilong pilai. Yumi no laik amamas tasol long gutpela na naispela ples yumi kisim pinis, yumi tu i  ken givim biknem long man i bosim dispela wok. Bai wanpela spesel samting i ken kamap insait long fil.” Nau namaba wan gavman i tok long kisim olgeta kristen ol i bin kalabusim i kam long fil. Bai ol i mas i dai long ai bilong dispela bikpela lain manmeri. Ol i go kisim planti manmeri, lapun na pikinini wantaim, i wokabaut i kam sanap long ples ol i laik kilim ol. Dispela ol manmeri i no krai. Nogat. Ol i wokabaut i kam na singim song na litimapim nem bilong God.  Ol i redi long dai long nem bilong Jisas. Nau wokman bilong nambawan gavman i opim ol bokis bilong laion i stap kalabus. Ol dispela laion i ran i kam na bagarapim tru ol Kristen na kilim ol i dai. Planti manmeri i amamas na bikmaus na givim biknem long dispela namba wan gavman i kilim ol Kristen. Ol i mekim olsem, na dispela bosman i mekim ples bilong pilai i kirap na tok  bikmaus tru na tok, “Mi tu mi wanpela Kristen.” Na ol i kirap nogut tru na ol i sem long mekim pati olsem long em. Bihain planti tok kros i kamap namel long ol. Ol i no amamas long em givim kain testamoni olsem long ai bilong ol manmeri i bin kam bung. Ol i no laik harim dispela tok, “Mi tu mi wanpela Kristen.” Olsem na ol i kisim em na tromoi em tu long ol laion, na em i dai. Dispela wokman i no ting long kisim biknem long dispela bikpela wok em i bin mekim. Em i amamas moa yet long kisim biknem long Heven. Jisas i tok olsem, “Man i save tokim ol manmeri olsem em i stap long lain bilong mi, mi tu bai mi tokim Papa bilong mi long Heven olsem dispela man em i bilong mi.” Matyu 10:32

Jerry Tupex i raitim