“DILAWA ita hanamoa!” (Yumi presim na tenkyu long God), nupela bisop bilong Daru-Kiunga Daiosis Bisop Joseph Durero, SVD, i tok.

Em i tok tenkyu long God long 62 krismas bilip i bin strong long daiosis. Em i tok pawa bilong God na Mama Maria i stap ples klia long wei ol pipel i kamap long lotu. Em i tok wantaim strong na gaidens bilong Holi Spirit em i redi long sevim ol pipel. Em i mekim dispela tok long taim em i kisim odinesen long kamap bisop na tu kamap nupela bisop bilong Daru-Kiunga Daiosis long las wik Sarere long Kiunga, Westen Provins. “Wantaim helpim bilong God; laik pasin, honesti na

tras i tok mi bihainim. “Yes, Lord Bikpela, mi laikim yu na dispela laik bilong mi long yu bai go pas long mi.” Het tok bilong odinesen em wantaim yu, mi stap Kristen, bilong yu mi kamap bisop na olsem mi laikim yu Lord. Long wankain taim, ritaia bisop bilong DaruKiunga Daiosis, Bisop Gilles Cote, SMM, long skul tok bilong em i tok Bisop Durero i mas stap gutpela wasman bilong ol sipsip. Em i tok wok bilong bisop i bilong givim sevis na i no bilong kisim pawa. Em i askim Bisop Durero long kamap sevanlida bilong ol pipel. “Jisas Krais i makim na salim ol aposel long tokaut long Tok bilong God na mekim holi ol pipel bilong God,” em i tok.

“Em i wok bilong bisop long skruim dispela wok na lukautim ol sipsip bilong em na helpim ol pipel bilong em long bihainim Gutnius. “Yu inap mekim olsem taim yu pas wantaim Jisas na larim Jisas i stap insait long laip bilong yu. “Wantaim daun pasin na strong bilong Holi Spirit, yu inap bringim ol pipel i go long Lord Bikpela. Bisop Durero i kisim ples bilong Bisop Cote. Stap long dispela lotu tu em Kardinal Sir John Ribat, MSC; Apostolik Nunsio Fermin Emilio Sosa Rodriguez, 9-pela bisop bilong ol arapela daiosis bilong kantri wantaim planti pater, brude, sista na ol manmeri bilong DaruKiunga Daiosis. Apostolik Nunsio Rodriguez i lukim dispela lotu olsem blesing bilong God. Em i askim Bisop Durero long stap wankain olsem ol “sipsip”, ol pipel bilong daiosis, long em i mas go pas long ol na mekim ol i lukim Bikpela olsem hop bilong ol. “Bilip na tras bilong yu long God inap helpim yu i kamap trupela wokman bilong em.” Bipo long Bisop Durero i kamap bisop, em i bin wok pater long Madang Asdaiosis long sampela yia.

Nigel Akuani i raitim