DOGU 1 kongrigesen bilong Emmanuel Yunaitet sios long Porebada i kamapim wantaim K30,000 mani long boubou (tenkyu) bung bilong ol long Porebada, Sentral Provins long las wik Fraide.

Inap olsem 5-pela klen bilong Dogu 1 i bin kamap na givim tenkyu ofa bilong ol. Wan wan klen i givim olsem K400 i go long K1200 ofa. Porebada komyuniti lida Len Soge i tok ol bilip manmeri long sios yet i sapotim sios. Em  i tok Rom i save sapotim Katolik Sios, olsem Jemani na Australia i save sapotim Luteran Sios na Inglan i save sapotim Englikan Sios. Tasol Yuniaitet Sios em ol bilip manmeri yet i save sapotim. Wanpela bikpela rot ol lokal kongrigesen i save sapotim sios na ol wokmanmeri bilong ol em long holim ol boubou. Em i tok London Miniseri Sosaiti na Metodis Sios i lokalais na kolim ol yet Yunaitet Sios. Long taim sios i

kamap olsem, ol waitman i go bek na olsem lokal bilip manmeri yet i mas sapotim sios olsem sios i ken go het long mekim wok bilong em. “Benk bilong Yunaitet Sios em lewa bilong ol pipel bilong Yunaitet Sios,” Soge i tok. “Taim mipela i givim mani, mipela i no save givim K20 o K50. Nogat. Mipela i save givim K100 stret. “Mipela i mas redi long givim wanem samting mipela i gat long Bikpela. “God i blesim dispela kantri na mipela i no ken soim olsem mipela i stap tarangu. God i givim planti blesing long Papua Niugini. “Olsem mipela ol Kristen, mipela i mas go het yet long sapotim Kingdom bilong God na ol wok manmeri bilong em. “Ol pipel  i mas sapotim sios olsem Tok bilong God i ken go het.” I gat 5-pela kongrigesen long Porebada sios na dispela ol kongrigesen em Aru’Utu, Dogu 1, Dogu 2, Poini na Emmanuel. Lokal sios i wok hat olsem skul bilong Jisas Krais i no pinis.

Paulus Tali i raitim