IVANJELIKKAL Luteran Sios (ELC) PNG long Namibung, Boana (Nawae), Morobe Provins i bin holim wanpela tenkyu lotu long tupela Sande i go pinis.

Dispela lotu i bin kamap long Wawin Nesenel Hai Skul, em long Sirimun kongrigesen long Arere long Sirimun, ol arapela 7-pela kongrigesen i bin kamap tu long dispela lotu. Ol i bin kamap wantaim  mani, kaikai na sampela samting moa na givim long ol pasto bilong ol lokol kongrigesen. Moa long 1000 manmeri i bin kamap long dispela bung. As tingting bilong holim dispela tenksgivim lotu em bilong kamapim Namibung peris opis. Ol manmeri i kamapim ol pilai tu bihain long lotu. ELC PNG Boana distrik presiden, Reveren

Towaman Sokekac i autim Tok bilong God. Em i toktok pasin bilong bilip manmeri i givim tenkyu long Bikpela i bikpela samting long ol bipo. Tasol taim i senis na planti manmeri i no moa holim strong bilip, i go lotu na givim luksave long kain lotu olsem. Em i tok long Bikpela olgeta samting i kam na ol i olsem ol i bilip manmeri, i mas skruim yet dispela bilip long pasin bilong ol. “Yumi i mas givim tok tenkyu long God long olgeta samting em i givim long yumi,” Towaman i tok. “Em i tok taim yu opim tingting na bel bilong yu na givim long God, God bai blesim yu moa.” Em i bihainim rit long Profet Malakai 3: 10, “Yupela i mas tilim olgeta samting bilong yupela long 10-pela hap na bringim wanpela hap olgeta long haus biong mi. Olsem na ol wokman bilong mi bai i gat planti kaikai. Yupela i mekim olsem na bai mi ken givim planti gutpela samting long yupela na yupela i no ken sot. Bihainim dispela rot na bai yupela i ken save olsem tok bilong mi em i tru olgeta.” Pasto Towaman i tok olgeta samting long heven na graun i stap long Bikpela na olgeta samting i pinis long em. Em i tok manmeri i no ken paul na gat kain kain tingting. Namibung peris i stap long namel bilong Lae na Nawae distrik na manmeri long kain kain rijon bilong kantri i stap long dispela hap. Morobe Gavana Ginson Saonu i bin kamap tu long dispela dispela tenksgivim lotu. Em i amamas long lokol sios i luksave long kain ol lotu olsem na skruim yet dispela bilip. Em i no mekim wanpela komitmen tasol i tok em i luksave long stap bilong Namibung peris na bai soim han mak bilong gavman bilong em long peris taim em i redi.

Paulus Tali i raitim