I gat wanpela yangpela boi em i save ran (Joging) olgeta moning long strit bilong taun em i stap long en. Wanpela moning, taim em i ran i stap, em i lukim wanpela bubu i stap long mausrot rot.

Bubu i tromoi stik bilong em bilong wokabaut i go antap long skai. Em i tromoi planti taim pinis, olsem na yangpela boi i gat interes na kamap klostu long bubu na askim; “Bubu, mi lukim planti taim yu wok long tromoi ol wokabaut stik bilong yu i go antap long skai. Bilong wanem yu mekim olsem?”. Lapun bubu i bekim: “Pikinini. Mi tromoi stik i go antap na kam daun em i bilong helpim mi long wanem daireksen mi mas go. Mi stap long mausrot, olsem na mi no save, wanem daireksen bai mi kisim nau? Mi tromoi stik, na taim stik i kam daun na het bilong stik i go long Not, Saut, Is o Wes, mi bai bihainim dispela daireksen bilong stik tasol”. Yangpela i aksim em gen, “Inap nau stik i no soim yu rot yet, a?. Bai yu tromoi gen a?” Lapun bubu i bekim askim bilong boi olsem; “Yes, mi bai tromoi i go i go inap long stik i soim daireksen bilong wokabaut bilong mi. Sapos em i no soim yet, mi bai tromoi yet. Mi laik painim ‘free will’ (laik bilong mi yet) bilong mi”. ‘Free will’ em i wanpela bikpela spesel presen bilong God i kam long yumi wan wan. Sapos yumi yusim dispela ‘free will’ o laik bilong yumi yet long gutpela wei, em i bai lidim yumi long stap gut na amamas oltaim. Long Sande 22 Ogas 2021, Kalenda bilong Lotu Katolik i bin kisim rit bilong Buk bilong Josua 24:1-2 +15-18, stori bilong ol lain Israel taim ol i kamap long Promis land. Bipo ol i stat long sindaun long wanpela ples, Josua i bin bungim ol na askim ‘free will’ bilong ol yet, long lotuim God husat i bin bringim ol i kamap long Kana, o ol i bai lusim na lotuim god bilong asples. Long fridom bilong ol yet ol i bekim askim bilong Josua olsem ol i bai i no lotuim god bilong as ples lain. Wantaim fri will bilong ol, ol i tokaut na wokim promis, bai ol i lotuim Bikpela husat i bin bringim ol kamap seif long promis land. I nogat wanpela i pusim ol. Wankain olsem Gutnius bilong Jon 6:6069. Bihain long mekim kamap planti bret na pis long ples nating, Jisas i givim skul long no ken painim kaikai bilong bodi tasol. Em i skulim manmeri long painim bret bilong givim laip bilong oltaim, em i Bodi na Blut bilong em. Taim em i tokim manmeri olsem husat i kaikai Bodi na Blut bilong em, ol i bai kisim laip oltaim oltaim. Manmeri i kirap nogut. Husat inap long kaikai mit na dring blut bilong man? Em i bai hat ya. Olsem na planti manmeri i lusim Jisas na i no wokabaut wantaim em gen. Em i ‘free will’ bilong ol yet. Jisas i no pusim ol long ol i mas kam bek long em. Nogat! Bihain em i askim 12-pela aposel bilong en, “Yupela tu laik i go?”. Long nem bilong 12pela Aposel, Pita i bekim askim bilong Jisas: “Mipela bai i go long husat? Yu bin skulim mipela long Laip i stap gut oltaim (Eternal life). Mipela i bilip long en. Mipela save olsem Yu tasol Holi man, God tasol i salim yu kam”. Em i ‘free will’ bilong Pita yet na ol arapela Aposel long stap pas wantaim Jisas. Bikos ol i save, Jisas i soim rait daireksen bilong laip. Ol i no bihainim narapela daireksen olsem ol narapela husat i lusim Jisas. Laik bilong yumi yet o ‘free will’ em i wanpela bikpela na spesel presen bilong God i givim yumi wan wan. Jisas i kam daun long dispela graun long soim daireksen bilong wokabaut bilong yumi long kisim Laip i stap gut oltaim. Sapos yumi yusim laik bilong yumi yet gut long bihainim daireksen bilong Jisas, em i save kamapim amamas long laip bilong yumi hia long graun na bihaintaim yumi pinis long dispela graun.