YUNAITET Sios long Alotau , Milen Be Provins i bin amamasim 40-yia anivesari bilong ol long 15 Ogas, 2021. Ol bilip manmeri bilong sios i amamas tu na givim tenkyu long Bikpela long dispela ol yia, ol i kisim blesing long bilip ol i gat long em.

Het tok bilong dispela selebresen em Amamasim Blesing bilong God long Wokabaut bilong ol. I gat tripela grup bilong selebresen na manmeri i makim wan wan ol rijen o ples bilong provins long go pas long selebresen. Dispela ol tripela grup em ol Elda, Senia Yut na Junia Yut  na ol i statim selebresen wantaim wok bilong karim plak. Long mas ol elda i karim plak, ol senia yut i apim (raising) plak na ol junia yut i sanap olsem gad, salut na paitim tamborin. Siaman bilong lokal sios long Dobu ailan, David Philip i karim plak na i makim Dokta Bromilow husat i bringim tok bilong God long Dobu ailan wantaim Methodis Sios, Meinlend Milen siaman i karim plak na i makim Alotau em provinsal hetkwata, Tonoak Aisi i siaman bilong Misima ailan na em i makim win mani ailan i givim long sapotim provins long maining wok we i bin kamap long ailan, Moses Mossco i siaman bilong KiriwinaMurua i karim plak na i makim sif bilong dispela rijen bilong provins. Ol yangpela i bin eskoting ol elda long taim bilong karim plak na ol yangpela yet i makim sios bilong tumora olsem tok bilong God bai i go moa yet long narapela 40 yia na bihain taim. Rait Reveren Leidimo Edoni bilong Yunaitet Sios long Papua Ailan Rijen i bin opim dispela selebresen. Ol bilip manmeri i pre olsem wantaim strong bilong Holi Spirit ol i sanap strong long bilip maski ol i bungim kain kain traim.