OL lokal Ivanjelikal Luteran Sios (ELC) PNG lida long liklik taun bilong Kabwum, Morobe Provins wantaim ol meri na bilip manmeri i redi long holim Nesenel ELC PNG meri bung long Kabum long 18 i go long 24 bilong Septemba.

Pasto Bayuso Basange bilong Ukata long Kabwum i tok dispela bai wanpela bikpela bung em distrik na distrik i amamas long holim dispela bung. Em it ok tenkyu long sapot ELC Ukata distrik i bin kisim pinis. Long las wik Sande wanpela bung i bin kamap long Lae Siti Maket graun we i lukim ol ELC bilip manmeri putim mani na ol arapela samting em distrik i laikim long holim dispela bung. Pasto Bayuso i tok namel long 300 i go long 400 meri deleget bai kamap long dispela bung. Distrik i lukluk long K700,000 mani mak long holim dispela bung. Inap long nau distrik i kamapim pinis K550,000. Dispela mani i kam long Gavana bilong Morobe, Ginson Saonu wantaim K500,000 na K50,000 long Dokta Kobby Bomoreo bilong Tewai-Siassi. Saonu husat i bilong Kabwum i amamas na i givim tu wanpela kar long ol meri yusim bai long ran long Finschafen na go long Kabum na i givim bot tu long ol meri husat bai ran long solwara i go long Finschafen. Dispela ol meri bai kam long 16-pela distrik bilong ELC long kantri. Pasto Bayuso i amamas long sapot distrik i kisim na i tok ol manmeri husat i givim sapot i givim wantaim bel na God bai blesim ol long sapotim wok bilong em. Em i tok maski kain kain hevi i stap olsem salens bilong sik coronavirus (COVID-19) ol bai bihainim olgeta protokol o lo bilong banisim sik na holim dispela bung. Em i pre olsem bung bai kamap gut.

Paulus Tali i raitim