HARIM, skelim na tokaut long tok bilong Bikpela em het tok bilong ritrit em pater na brude bilong Sosaiti bilong Salesian (SDB) i bin go wantaim long wanpela-wik ritrit bilong ol long Pot Mosbi i no longtaim i go pinis.

Pater Eduardo Raveilla (SDB), wanpela Salesian pater i tok dispela het tok na wantaim ol toktok i sut long ol salens i kamap long bilip bilong ol manmeri na wok bilong ol long dispela taim. Tok bilong autim tok i go wantaim tu het tok Ivanjelaisesen em Katolik Bisop Konprens (CBC) bilong Papua Niugini na Solomon Ailan i makim long 2021 Litejikal Kalenda. Pater Gregorio Bicoming, Provinsal Superia bilong SDB bilong PNG Provins i bin go pas long dispela ritrit. Inap long 17 misineri i kamap long dispela ritrit. Wanpela pater daiosisen pater wantaim wanpela sista long lain Sosaiti bilong “Sister of Jesus” i bin stap tu long dispela ritrit. Pater Gregorio i tok ritrit i taim bilong yu i mas kisim yu i go longwe long ol arapela na ol wok yu mekim na stap bilong yu yet olsem yu ken “stop, harim na skelim singaut bilong God long laip bilong yu.” Em i tok wan wan ol taim na ol Sakramen em ol taim yu serim wantaim amamas, ol hevi na ol salens long prea bilong yu. “Ol toktok na ol presentesin i gat strong na i klia wantaim helpim bilong vidio na slaid,” Pater Ambrose Pereira, SDB, i tok. “Mipela i tingim moa yet dispela ol vidio na sliad mipela i lukim.” Pater Arjuna, SDB, wanpela nupela pater husat i joinim Salesian PNG Provins i no longtaim i go pinis i tok ol askim insait long ritrit i strongim bilip bilong ol tu. “Yu mekim wanem samting, yu save tokaut long Jisas, yu save mekim stret wok bilong yu bihainim singaut bilong yu,” Pater Arjuna i tok. Em i tok dispela na sampela moa ol kain askim sutim tru bel bilong ol olsem ol i mas mekim wok stret bihainim laik bilong God. Em i tok i gat ol salens long laip bilong em tasol oltaim em i askim na lukluk long God long strongim em. “Mi mekim wok na we mi i no inap em mi lusim long han bilong God long inapim.