Harim God i mekim gut pinis long yupela na em i larim yupela i mekim wok bilong Krais. Em i no larim yupela i bilip tasol long Krais. Nogat.

  Em i larim yupela i karim pen tu long nem bilong em. Filipai 1:29. Sapos Jisas i bin singautim yumi long kam bihainim em, na yumi bihainim dispela singaut pinis, orait yumi mas save, sampela hevi bai inap long painim yumi. Nogat hevi i bungim yumi na yumi i tok, “Bilong wanem mi  bihainim bikpela Jisas na hevi painim mi.” Sampela ol manmeri i save ting olsem, taim mi tanim bel na bihainim Jisas, olgeta hevi na wari bilong mi bai pinis na bai mi stap long gutpela laip. Tasol nogat Jisas i skulim yumi long sanap strong long bilip long taim bilong hevi. Jisas i tok long Jon 16:33. “Mi laik bai yupela i pas long mi na bai yupela i stap  bel isi, olsem na mi mekim dispela tok long yupela. Long taim yupela i stap long dispela graun, ol hevi bai kamap long yupela, tasol bel bilong yupela i ken stap strong. Mi winim pinis strong bilong dispela graun.” Insait long Kristen laip i gat wok bilong karim hevi i stap. God i laik kisim biknem long ol dispela hevi i kamap long yumi. Hevi i save gat gutpela blesing insait long Kristen laip. Sapos wanpela liklik hevi o pen i kamap, yumi ken amams na tok, “Tenkyu God , laik bilong yu i ken kamap long laip bilong mi.” Na sapos bikpela hevi i kamap long yumi ken tok wankain. Tasol nogut yumi amamas na tok tenkyu long ol hevi i kamap long asua yumi, yumi yet i bin mekim. Dispela bai i no helpim yumi na God i no kisim biknem. Yumi ken prea olsem Aposel Paul i prea long Filipai 3:10. Mi laik save tru long Krais. Krais i bin kirap bek long matmat, na em i gat bikepla strong, na mi laik save tru long bikpela strong bilong em. Mi laik poromanim em long pasin bilong karim pen. Na mi laik holim wankain tingting olsem em i bin holim long taim em i dai.” Taim hevi na pen i painim yumi, orait yumi laik tingim ol dispela hevi Bikpela bilong yumi Jisas Krais i bin karim. Hevi em i karim bilong baim bek yumi i bikpela moa na i winim tru olgeta hevi i save kamap long yumi. Yes dispela pen na hevi bilong yumi i liklik samting sapos yumi tingim gutpela laip tru i wetim yumi long Heven. Aposel Paul i tok, “Mipela i save, ol dispela hevi na pen mipela i save karim, ol i no bikpela tumas, na ol bai i stap sotpela taim tasol. Na ol bai helpim mipela long kisim gutpela sindaun tru long Heven, na mipela bai i stap oltaim oltaim. Na mipela  save, ol dispela gutpela samting mipela bai kisim, ol winim tru olgeta arapela samting.” 2 Korin 4:17 Na Pol i tok long Rom 8:16. Dispela gutpela sindaun na biknem bai i kamap ples klia long yumi bihainim, mi ting em bai i winim tru dispela pen yumi save karim nau long dispela taim.

Jerry Tupeks Kolum