OL lain misineri pater na brude bilong Oda bilong Dominic i bin amamasim Pesto De bilong Faunda bilong ol Santu Dominic long Honiara, Solomon Ailan long 7 Ogas. Ol i bin amamasim dispela de wantaim ol misinari bilong Marist pater na brude na ol manmeri tu wantaim.

Pater Peter Lalaiagalo, OFD, wantaim helpim bilong Vika Jeneral bilong Honiara Daiosis, Pater John Galvin na 10pela ol arapela pater i bin go pas long lotu. Ol Dominican Sister i bin stap tu long dispela lotu. Wantaim ol em ol Rurete Gilbertese komyuniti husat i bin kamapim ol gutpela so tu

long dispela bung. Long skul bilong em, Pater Peter i tokim kongrigesen olsem maski wanem singaut ol i gat long laip, olgeta i gat wok bilong autim Gutnius na mekim Kingdom bilong Bikpela i kamap bikpela hia long graun. Em i tok taim manmeri i kisim Sakramen bilong Baptismo, ol i kisim singaut bilong autim Tok long wok na laip bilong ol. Dispela singaut i bihainim tu as tok bilong Katolik Bisop Konprens bilong Papua Niugini na Solomon Ailan long wok bilong Ivanjelaisesen. Ivanjelaisesen i min, telimautim Tok bilong Bikpela long olgeta hap bilong graun. Moa long 300 manmeri i bin kamap long amamasim Pesto De.