Tasol mi tokim yupela olsem, yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela.

Matyu 5: 44 Givim bel long birua em i no pasin bilong yumi pipel bilong graun. Nogat. Em i pasin tru bilong ol pipel i save wokabaut i go long rot bilong Heven. Sapos wanpela i mekim nogut long yumi, kwiktaim yumi tingting long pasin bilong bekim rong. Planti hevi na pait i save kamap long dispela pasin bilong bekim rong bilong ol birua. Pasin bilong bekim rong em pasin bilong ol man i wokabaut long rot bilong hel paia. Tasol ol pipel husat i tanim bel pinis em ol i kisim nupela pasin. Dispela ol pipel i bihainim pasin bilong Jisas. Jisas i bin tok long givim bel long ol birua, na beten long God i ken helpim ol pipel husat i mekim pasin nogut long yumi. Jisas em yet i mekim olsem. Tingim!. Taim em i hangamap antap long diwai kros na kisim bikpela pen, dispela taim em i prea, “Papa, yu ken lusim sin bilong ol. Ol i no save long dispela samting ol i mekim,” Luk 23:34. Taim ol pipel bilong graun i birua long yumi ol pipel bilong Heven. Dispela em i kamap pinis long Jisas na em i no nupela samting. Ol pipel i birua long Jisas pinis. Jisas yet i bin tok, “Ol bai i kotim yupela long ol kaunsil bilong ol, na ol bai wipim yupela...Man bai kotim brata bilong en na tokim ol long kilim dispela brata i dai. Na bai ol papa bai mekim wankain pasin long ol pikinini bilong ol. Na ol pikinini bai birua long ol papamama bilong ol na tokim ol man long kilim ol i dai. Na olgeta man bai i bel nogut tru long yupela, long wanem, nem bilong mi em i stap insait long yupela. Tasol ol manmeri i stap strong inap long las de, God bai kisim bek ol. Matyu 10: 17, 21-22. Bilong wanem ol man i bel nogut long ol kristen? As, em nem bilong Jisas i stap long ol. Sapos nem bilong Jisas i stap long ol, na sapos nem bilong Jisas i stap long yumi, dispela em bikpela samting. Bai yumi gat strong. Yumi gat strong taim birua i krosim yumi. Yumi gat strong long givim bel long ol birua bilong yumi sapos ol i bel nogut long yumi. Yumi gat strong long beten long ol birua long God i ken helpim ol. Long nem bilong Jisas yumi gat strong long bekim gutpela pasin long ol man i mekim pasin nogut long yumi. God i givim dispela strong long yumi ken mekim ol dispela pasin. Sapos yumi larim dispela pasin bilong God i wok long laip bilong yumi, bai bikpela pe i wetim yumi long heven. Matyu 5: 10-12 i tok, “Ol manmeri i save bihainim stretpela pasin na long dispela as ol i kisim hevi long ol arapela, em ol i ken amamas. Kingdom bilong mi em i bilong heven. Sapos ol i lukim yupela i stap long lain bilong mi na ol i tok nogut long yupela na ol i mekim nogut long yupela na sutim kainkain tok giaman long yupela, orait yupela i ken amamas. Yupela i ken bel gut na amamas tru, long wanem, bikpela pe i wetim yupela long heven.”