BIKPLEA distrik lotu bilong ol Papau New Guinea Bible Church (PNGBC) Meri i kamap long Bereina insait long Inuwaiya Village long Kairuku Hiri Distrik. Dispela bung i bin kamap long Ogas 13  go inap long Ogas 15.

Namba bilong ol meri husat i go long dispela bung i bin stap olsem 670 olgeta. Het meri bilong ol Sauten Distrik mama Ps Meri Joyce Tunge i tok namel long ol, sampela mama bilong ol narapela sios olsem Katolik na ol pentekostel sios tu i  bin go stap long bung. Taim wanpela mama i pret long God na i stap aninit long man bilong em, olgeta samting insait long haus i save stap gut na nogat hevi long famili na komyuniti tu. Ol meri i ken kamapim wanpela gutpela famili o bagarapim wanpela famili. Ol i gat pawa long mekim dispela, Pasto Meri Tunge i tok. Morin Inape meri husat i bin karim PNGBC i go long dispela ples Inuwaiya i tok amamas na tenkyu  long dispela bikpela namba bilong ol meri long go na helpim long serim ol pipel insait long Mekeo long tok bilong God. Ol meri husat i bin go long en i kisim gutpela skul tok long lukautim famili na long kamapim ol gutpela pikinini na mekim ol samting bilong wanpela komyuniti i bai stap gut. Wanpela misineri Pasto Meri Magaret long dispela ples Mekeo i tok nogat wanpela meri i save go antap long haus bilong sif tasol mipela i go na mekim lotu em i wanpela bipela samtin tru. Pasin kastom em i save strong tasol Papa God i mekim gut long mipela na mipela i gat sans long kam lotu long dispela haus.

Paulus Tali i raitim