WANPELA spesel lotu i bin kamap long Namibung peris long Ivanjelikal Luteran Sios (ELCPNG), Boana distrik (Nawae) long Morobe Provins las wik.

Ol sios lida na bilip manmeri long peris i bung long givim tenkyu long Bikpela na tu long bungim mani long kamapim nupela opis bilong peris. Kongrigesen i kamapim pinis K25,000 long dispela taim. Morobe Gavana Ginson Saonu i namel long ol arapela manmeri husat i kamap long bung. Namibung i gat nem long histori bilong ELCPNG long wanem em i hap ol pasto bilong bipo i save mekim namba wan pastoral wok bilong ol bipo long ol brukim bus na go long Hailans rijon long autim Gutnius. Presiden bilong ELC Boana distrik Reveren Towaman Sokeka i tok dispela ol pasto i soim rot pinis na nau i taim bilip manmeri i mas bihainim na autim tok bilong Bikpela. “Taim yumi kisim baptais, yumi kisim mak na kamap pikinini bilong God,” em i tok. “Yumi no moa stap haiden na bihainim

bilip em ol tumbuna bilong yumi i bin gat long em. “Yumi kamap pikinini bilong God, yumi mas autim stret tok bilong em. “Jisas pikinini bilong God Papa i salim Holi Spirit i kamdaun long strongim yumi.” Reveren Sokeka i tok kisim Sakramen bilong Baptais i soim yumi husat olsem yumi lusim olpela bel na kamap nupela manmeri. Em i tok dispela em i mining bilong laip bilong yumi, long as yumi kamap na stap long graun. “Yumi i no ken go long olpela bel na bihainim ol samting we i no gutpela long ai bilong God, husat i wokim yumi,” em i tok. “Wok bilong ivanjelaisesen o autim Tok Bilong God i no isipela samting. “Yu mas pas wantaim God long wokabaut bilong yu olsem yu ken sanap strong.” Siaman bilong Namibung Luteran sios long Erap, Boana distrik, Kapok Bungkulip i tok tenkyu long ol manmeri long sapotim kamap bilong bung. Em i tok tenkyu tu long Gavana Ginson Saonu tu na ol arapela lidaman long kamap.

Paulus Tali i raitim