YUNAITET Sios i lusim wanpela longtaim pasto. Dispela em Pasto Marava Madu na em i dai long las mun long Mosbi.

Pasto Labe Burana, wanpela man husat i luksave long Pasto Madu na i bihainim lekmak bilong em na kamap pasto i tok Pasto Madu i wanpela strongpela wokman bilong God. Em i tok bihain long Madu i pinisim skul bilong kamap pasto, em i mekim namba wan wok long Saroa Seket long Bore Lokal Sios long Sentral Provins long 1980. Bihain long dispela em i go long Sivitana. Long 1984 em i bin go bek long Sarokeina na i kamap Siaman bilong Saroa seket. Long 1985 i bin go long 1987 em i wok long Boku na long 1988 i bin go long 1990 em i wok long Maopa Seket long Abau. Long 1991 em i bin go long Gabagaba Seket na long 2000 em i bin go bek long Saroa Seket. Pasto Madu wantaim meri bilong em i bin wok planti taim long Is Papua rijon. Em i bin wok hat long strongim Kadeboro Seket long Is Papua rijon long taim seket i gat planti hevi long wok bilong bilip na edministresen. Wanpela man i rait long Facebook na i tok Pasto Madu i wanpela pasto yu i no inap abrusim long ol bung bilong sios. Em i tok Pasto Madu i save laikim olgeta manmeri na i laik bungim olgeta maski yu bikpela o liklik manmeri. Em i pre olsem Bikpela i givim gutpela malolo long sol bilong Pasto Madu na givim bel isi long famili bilong em.