LAS wik ol yangpela bilong St Andrew Sios long Ampo, Lae i makim Remembrans De long Julai 23
wantaim skul histori bilong bikpela pait long Wol Woa 2.

Ol yangpela bilong Luteran Sios i lainim olsem
haus lotu bilong ol i winim dispela bikpela pait na i stap yet. Dispela haus lotu i bin kamap haus sik bilong
ol soldia bilong Siapan. Bihain long Woa i pinis ol Luteran i dediketim dispela haus lotu gen na nau ol i go
bek lotu long en. Long yia 1938 ol misineri i bin bildim dispela haus lotu tasol i no longtaim na Wol Woa
2 i kam.
Ol yangpela i bungim ol olpela poto na video bilong woa na mekim ol eksibisen we ol arapela Luteran
memba na ol memba long komyuniti bilong Ampo na Lae i kam lukim na lainim dispela histori. Planti
histori stori i kamap long dispela taim. Namel long dispela ol stori em stori bilong St Andrew haus lotu
long taim bilong Wol Woa na tu bilong tupela misineri husat i ranawe wantaim misin balus long
Malahang ples balus na i go olsem long Wes Papua. Long hap tupela i lusim balus na ranawe i go long
ples bilong tupela long Jemeni. Ol yangpela i lainim
tu stori bilong Sip-paia wanpela naispela nambis long Wagang we bipo planti pipel long Lae i save go
waswas na kisim win long en. Long dispela hap wanpela bikpela pait tru i bin kamap namel long ol
Siapan na ol Allied Fos na sip bilong ol Siapan i bin paia. Na nem Sip-paia i kamap long makim dispela
stori. Long Nadzab, bikpela ples balus bilong woa bilong Noten Alaens Difens i stap. Long hia planti woa
balus I bin pundaun na kirap. Ol balus ya i karim kago bilong pait, kaikai, marasin, ol soldia na planti em
ol balus bilong pait. Nem Nadzab em i min
‘Northern Alliance Defence Zone Air Base’. Dispela eksibisen i bin kamap bihain long wanpela divosen
lotu long tingim ol soldia husat i bin dai long taim bilong woa. Namel long ol eksibisen planti arapela
ektiviti bilong pilai na amamas na winim prais tu i bin kamap. Ol yangpela husat i bin kamap long dispela
de i bin amamas tru long lainim dispela histori. Wanpela bilong ol em yut lida Jeremiah Moa husat i tok,
dispela eksibisen i mekim mi tingting moa na givim veliu long ol samting i stap olsem ol olpela sios
bilding.