I NO longpela taim i go pinis, Pop Francis i bin tokaut long selebretim spesel de bilong ol Bubu. Yumi i gat
de bilong Pikinini, de bilong Yut, de bilong Mama na de bilong Papa.

Tasol i nogat de bilong ol bubu yet.
Olsem na, statim dispela yia 2021, long olgeta las Sande bilong mun bilong Julai, emi de bilong ol Bubu.
Yumi selebretim de bilong Bubu long Sande i klostu long de 26 Julai, em i de bilong Pestode bilong
Joakim na Anna, papa na mama bilong Maria mama bilong Jisas. Mi save olsem planti peris i no
selebretim de bilong Bubu long 25 Julai 2021, bikos planti i no save yet. Toksave i go long olgeta Bisop na
edministreta bilong Daiosis. Ol i salim dispela toksave i go long olgeta Peris pinis o nogat, em i stap long
han bilong Bisop bilong wan wan Daiosis. Insait long Goroka Daiosis, taim mi kisim dispela Toksave long
taim bilong AGM long Pot Mosbi, mi bin salim i go long wan wan Pater yusim WhatsApp grup bilong
Klerji bilong Goroka Daiosis. Mi hop olgeta Pater i bin salim toksave i go long olgeta Austesen long
selebretim de bilong Bubu. Insait long St. Mary’s Peris long Goroka Taun, mi bin selebretim tupela Misa
long Sande bilong selebretim de bilong Bubu. Toksave i go long olgeta Pater tripela wik i go pinis. Long
tupela Misa wantaim long Sande, mi bin ofaim dispela Santu Misa bilong prea bilong helpim ol bubu bai
God i ken sambai long ol olgeta taim na givim gutpela helt long ol, espeseli long dispela taim bilong
COVID-19. Wankain Santu Misa, mi bin ofaim na prea long sol bilong ol bubu i dai pinis, bai God i ken
pogivim sin bilong ol na welkamim ol i stap amamas wantaim olgeta Santu long Heven. Bihain long
Komunio, mi save blesim olgeta pikinini. Long taim bilong COVID-19, mi no blesim ol wan wan. Ol i kam
bung long fran bilong alta, mi putim han antap long ol, prea na blesim na mi tromoi holi wara long ol.
Long de bilong ol Bubu, mi ofaim spesel blesing bilong olgeta Bubu. Olsem na bihain long blesim pikinini,
mi singautim olgeta Bubu i kamap long fron bilong alta, na mi putim han antap long ol na wokim spesel
prea bilong blesim i go long ol. Prea bilong blesim i pinis, mi tromoi holi wara long ol. Mi lukim planti
bubu i amamas tru, bikos ol i kisim spesel blesing long spesel de bilong ol Bubu. Bihain long Santu Misa,
mipela i go het wantaim selebresen ausait long haus lotu. Mipela i nogat Peris Hall yet, olsem na mipela i
bung aninit long mango diwai na selebretim wantaim narapela narapela. Peris i bin redim tupela keik, na
sampela bret na dring. Mi bin askim tupela bubu long wokim toktok bipo mipela i katim spesel keik
bilong ol. Wanpela bubu meri na wanpela bubu man i wokim tok long ekspresim amamas bilong ol
olsem Katolik Sios i luksave long ol bubu na redim wanpela spesel de bilong ol bubu bilong Peris i ken
bung na selebretim wantaim de bilong ol. Ol i tokaut amamas moa moa yet na tok bikpela tenkyu i go
long Pop Francis husat i luksave long ol bubu, maski em i no lukim ol bubu bilong St. Mary’s Peris Goroka
na bubu bilong St. Mary’s i no lukim em yet, tasol ol bubu i ekspresim amamas bilong ol bikos bai olgeta
yia i gat de bilong ol Bubu. Sampela i tok olsem dispela em i namba wan taim, olsem na ol i no redim ol
yet gut. Tasol neks yia na narapela yia i kam, bai ol i redim ol yet gut, na bungim olgeta bubu long wokim
ritrit o rekoleksen bipo long de bilong Bubu i kamap. Olgeta i hop bai neks yia selebresen bilong em bai i
kamap bikpela moa.