JULAI 4 em i wanpela bikpela de bilong ol Katolik long Sentral provins. Olgeta yia ol katolik i save mekim
pilgrim i go long Yule Ailan,

Kairuku Distrik long Sentral Provins long tingim gen na selebretim namba
wan taim ol namba wan lain misineri i bin selebretim yukaris long dispela hap long 4 Julai 1884. Ol pipel i
stori olsem taim pater Henry Vairus i mekim lotu i stap wanpela wel pik i bin ran long bus i kam na
bamim tebol na kapsaitim kap wan – we nau ol Katolik i bilip blut bilong Jisas i kapsait long graun bilong
Papua Niugini long dispela ailan long dispela taim. Tripela yia bihain, long 1887 ol arapela misineri bilong
Sacred Heart na De La Salle i bin kam. Ol pilgrim bilong Pot Mosbi husat i bin go long Yule Ailan long
dispela yia i raun lukluk long ol matmat bilong ol misineri, ol pos na sampela banis bilong skul we ol
pastaim misineri i bin wokim.
Antap long het bilong ailan ol pipel long Yule, Kairuku na ol katolik i save lukim dispela hap olsem ‘holi
graun’. Long Yule Ailan ol sista i bin sindaun na kirapim Our Lady of Sacred Heart (OLSH) hai skul bilong
ol yangpela meri. Ol sumatin husat i kamaut long dispela skul i bin sampela strongpela meri tru long
wanem planti samting long dispela skul olsem ol haus ol yet i mas mekim. Ol De La Salle brude i go
sindaun long Mainohana, Bereina na kirapim skul
bilong ol yangpela man na tu ol i kirapim wanpela tisa koles. Dispela tisa koles nau em i wanpela
praimeri skul. OLSH hai skul long Yule Ailan I pas pinis na nau olgeta sumatin I go skul long Mainohana.
Olgeta yia long Julai 4 dispela pilgrim i go long Yule Ailan i save kamap. Planti ol pilgrim i kam bek long
Yule Ailan long stat bilong mun Julai i pilim bilip bilong ol i kamap nupela gen na ol i amamas dispela
histori bilong Katolik Sios I stap yet.

Rosa Koian i raitim