OL meri i kamaut long bun bilong ol man, olsem tasol ol man mas save olsem ol meri em hap bun bilong
ol,” wanpela lida meri i tok.

Sios bilong Nasarin nesenel wimen presiden Rosen Kiap i mekim dispela tok
las wik long namba tu meri konvensen bilong Sios bilong Nasarin Jiwaka Not Distrik we ol Kimil-Dei seket
women’s ministri i holim long Kondopina long Dei Kaunsel, Westen Hailans provins. “Ol man mas save
olsem strong bilong ol i stap wantaim ol meri. Man mas rispektim meri na kisim ol olsem wan bodi
bilong ol stret. “Taim yu lukim olsem ol mama i stap gut long haus, famili i stap gut, komyuniti i stap
stret, na kantri i ran orait. “Yumi mas lukluk gut long ol tok i stap insait long Baibel na bihianim long
kamapim gutpela famili long strongim sosaiti bilong yumi. “Yumi mas kisim was bikos dispela man nogut
Satan i usim kainkain wei na pawa long bagarapim marit laip na famili bilong wanem em i save olsem
famili em i as bilong blesin na gutpela sindaun. “Long tok gris bilong Satan tasol na ol man i lusim namba
wan meri bilong ol na maritim ol namba tu na tri meri na i bagarapim famili,” Misis Kiap i tok. Kinjibi-
Mala lokal level gavman (LLG) presiden Rodney Rot Kur wantaim ol faivela (5-pela) wod kaunsila
bilong em i welkamim ol meri na i amamas long ol gutpela skul tok we ol i kisim long dispela wan wik
konvensen. “Dispela bung i opim ai bilong mipela ol yangpela man na papa long luksave olsem ol meri i
no namba tu o samting nating. “Ol i gat strong na pawa long sapotim mipela ol man long sanap strong
na divelopim kaunsil wod, distrik, provins na nesen bilong yumi Papua Niugini. “Mi kisim maus bilong ol
pipel bilong Kinjibi-Mala LLG na tok tenkyu long Sios bilong Nasarin long kisim dispela bung i kam long
konstituensi bilong mi,” Mista Kur i tok. Sios bilong Nasarin Jiwaka Not Distrik Superintenden Reveren
Philip Nolie i amamas long ol lida bilong
Kinjibi-Mala long gutpela pasin bilong ol. “Mi i no save lukim wanpela LLG presiden wantaim ol kaunsila
bilong em i save soim kain rispekt long wanpela sios grup olsem tasol dispela em namba wan taim tru mi
ken lukim. “Ol meri stap na komyuniti i kisim strong. Sapos ol meri na mama bilong yumi i raun paul
nabaut, hau bai man i sanap gut na kamap lida? “Adam na Eve em tupela wanpela tasol, olsem tasol
man na meri mas stap wan insait long famili,” Rev Noli i tok. Sios bilong Nasarin i gat ol gutpela program
bilong ol man, meri na yut, we ol i save witnes long ol manmeri na karim aut ol Ministri bilong Jisas
olsem autim tok, skulim na oraitim sik.

Hoffmann Gulgarye i raitim