LONG Rabaul las wik 32 yut lida bilong Mary Helpim bilong ol Kristen Peris, Rapolo i bin stap long
wanpela wan-de fomesen
trening.

Dispela trening i bin kamap long Haus Sekan Ritrit Senta long Rabaul. Program i bin stat
wantaim ol liklik pilai bilong bildim tim. Peris pris Pater Moise
Paluka, sdb i bin lukluk long ol liklik pilai ya na kisim ol liklik tingting bilong lidasip long en na stori
wantaim ol yut lida. Namba wan hap bilong trening em Salesian Yut Spiritualiti. Pater Moise i tok long ol
yut lida long pasin bilong toktok na Salesian Yut Ministri. Insait long ol toktok bilong en, Pater Moise i
stori moa long pasin bilong ol Salesian olsem pasin ol yangpela i ken harim, lukim na bihainim. Long
spiritualiti em i toktok long pasin bilong spirit long laip bilong wan wan long olgeta de, long luk fowot,
long amamas, long sios na Mama Maria na pren wantaim Jisas na rispon long sevis. Em i strongim ol
yangpela long klia tru na mekim ol yet i save long pasin na spirit bilong Don Bosco na bai ol i ken mekim
wok bilong ol gut olsem ol pia na enimeta. Long apinun ol yut lida i lainim pasin bilong plenim ol wok
bilong ol na bihainim skelim ol wok kamap. Dispela hap bilong trening em Noli Genovia wanpela
instrakta bilong Don Bosco Teknikol Skul i givim. Bihainim pasin bilong ol katolik, trening i pinis wantaim
wanpela Misa we Pater Moise i go pas long en.

Christine Maden i raitim