WANPELA pater bilong Divine Word Missionary (SVD) Pater Peter Kim i laik bai ol Katolik manmeri bilong Denglagu i mas strongim wok insait long sios na famili long kamap strong.

Pater Peter husat i SVD distrik superia bilong Kundiawa daiosis long Simbu Provins na Goroka, Isten Hailans na tu peris pris bilong Dirima paris (Simbu) i tok blut bilong tupela namba wan lain SVD misinari i kapsait pinis long graun bilong Gembogl distrik.

Bun bilong wanpela pater em ol lain Denglagu i planim long graun bilong ol long Kangrie.

“Long dispela as singaut i go long ol pipel bilong Denglagu long ol i mas sanap na mekim wok misin na wok insait long Spirit bilong Bikpela God  i go long ol narapela hap,” Pater Peter husat i bilong Saut Korea i wok misin insait long kantri moa long 20 yia i tok.

Pater Kim i mekim dispela tok long taim ol Katolik manmeri bilong Kundiawa Daiosis i bung long Denglagu long Trinde bilong wik i go pinis long amamasim125 yia wok misin bilong SVD insait long kantri.

“Sios em SVD i planim pinis long Denglagu, Simbu na Hailans taim ol namba wan misinari i kam long dispela ples long yia 1933,” em i tok.

“Ol misinari i lainim yupela long tok bilong God na givim save long yupela long skul na soim yupela long pasin bilong Krais. Dispela pasin em bilong givim na lukautim ol narapela.

“Em dispela rot yumi mas wokabaut long em.”

Pater Peter i tok taim ol pipel i tingim bek long ol hevi ol  namba wan misinari i bungim long bringim Gutnius long ples bilong yumi na ol pipel i mas tingim dispela hat wok bilong ol.

Em i tok ol pipel i harim na tingim ol stori bilong dispela ol misinari ol i mas kisim strong long dispela tu long bilip bilong ol.

Ol pipel i mas kisim pasin bilong pre, penens na askim Holi Spirit long soim ol long rot bilong bilip.

“Ol namba wan misinari i planim sid pinis long graun bilong yupela,  yupela i no ken larim dispela sid i lus long graun,” Pater Peter i tok.

“Nogat. Yupela i mas lukim dispela sid i gro na  karim kaikai.”

Narapela lokal SVD pater Norbert Koima bilong Denglagu long taim em i luksave long strong bilong ol pipel long bung wantaim long amamasim 125 yia Jubili bilong SVD i askim ol bilip manmeri long sanap strong na soim dispela bilip long wok bilong ol.

 “Tok tenkyu bilong yumi i go long SVD i mas i gat mining na i mas kam aut long wok bilong yumi i go long pinisim dispela wok yumi i gat long laip bilong yumi,” Norbert i tok.

Lokel daiosisen pater na tu Vica Jeneral Pater Bill Kuklame husat i makim maus bilong daiosisan pater bilong Kundiawa i tok tenkyu long SVD long wok bilong ol long kamapim ol lokal pater long daiosis.

Pater Bill i tok ol lokal pater bilong Kundiawa daiosis i han mak bilong wok bilong ol SVD.

Simbu nau i gat tupela lokal SVD pater na wanpela i oden diaken na i wok stap na wet long oden long kamap pater.

Bihain long bung ol pipel bilong Denglagu i givim wanpela pik i go long Pater Peter long amamasim wok bilong ol SVD long Denglagu peris. 

Bipo long bung i kamap ol pipel bilong Womatne, ples we tupela namba wan SVD misinari i dai, Pater Karl Morschheuser na Brude Eugene Frank em ol ples man  i kilim long banara i givim bikpela tok sori long ol SVD.

Ol i tok sori long dispela asua ol tumbuna i bilong ol i bin mekim.

Ennio Kuble i raitim