KUNJIGINI Peris insait long Maprik dineri long daiosis bilong Wewak i bin kamapim 4-pla de selebresen long makim 125 yia jubili bilong ol SVD misinari long Papua Niugini.

Em i taim ol i tingim taim namba wan Katolik Divain Wod (SVD) Misineri i bin kamap long daiosis bilong Wewak na long kantri Papua Niugini long mun Ogas 13,1896.

 Moa long 1000 ol Katolik manmeri, yangpela na pikinini bilong peris wantaim pris na ol komiti blong selebresin i bin mekim planti prea na sakrifais na wok hat tru long redim dispela selebresen i mas kamap gut. Ol pipel yet i redim kaikai, klinim ples na stretim haus slip bilong ol long stesin. Long dispela 4-pela de selebresen i bin gat planti gutpela fomesen program bilong givim skul long ol lei manmeri, ol histori bilong sios long Wewak daiosis na Kunjingini peris.

Sampela SVD pater tu i bin kamap long witnesim dispela bung long Immaculate Heart of Mary Peris Kunjingini.

Ol narapela lain tu i kamap long givim ol sampela skul em Divisen Bilong Komyuniti Divelopmen Lukautim Pikinini na Jenda Bes Vailens i givim skul long pasin bilong lukautim pikinini na stopim ol bagarap long kamap long ol pikinini. Na tu ol givim skul tok long no ken bagarapim meri. Pasin bilong paitim na bagarapim meri i wok long kamap bikpela long ol planti ples long olgeta hap bilong kantri Papua Niugini.

Famili for Change wanpela grup i go pas long helpim ol meri husat i save kisim bagarap long jenda bes vailens tu i kamap na givim tok skul long lukautim gut meri na i no ken bagarapim ol. Ol meri tu gat nem na namba ol i gat rait na nogat wanpela man i ken tekewe rait bilong nating. Na toktok strong tu olsem lo bai mekim save long ol man i save bagarapim meri.

Long wankain tu Eva Wangihama Sekreteri bilong Leiti Komisin long Katolik Bisops Konprens long Pot Mosbi i bin kamap na givim liklik skul long vokesen bilong ol lei manmeri insait long sios, na ol astingting bilong tripla yia bilong ol lei manmeri 2019-2021.

Mis Wangihama i tok, “Ol lei manmeri mas stap holi na kisim skul long tok bilip bilong Katolik sios na go aut long wok misin bilong ol insait long famili, komyuniti na peris bilong ol.  

Alex Anis Wewak Daiosis Leiti Kodineta tu i bin kamap na givim tok long helpim ol lei manmeri long stap trupela witnes long wok ridima bilong Krais insait long laip na famili bilong yumi wan wan, yumi famili em liklik sios taim yumi stap laip yumi bringim dispela lait i go long sios olgeta. Taim bilong ol misineri i kam em pinis. Na nau em taim bilong yumi long kamap misineri namel long ol wanlain na wanpisin blong yumi. Na tu salim misineri go aut long ol narapela.

Ol perisina yet i bin kamapim planti drama, komposim singsing bilong makim stori bilong ol namba wan misineri i bin kamap long Kunjingini peris long yia 1949.