KLOSTU olsem 1000 yangpela  manmeri o yut insait long dineri bilong Madang Katolik Asdaiosis i bin bung long wanpela bikpela yut rali we long Alexishafen long las wik.

Pastaim long ol dispela yut i bin bung stat long Madang taun na wokabaut  long samting olsem 10-kilomita long rot i go olgeta long Alexishafen long not kos rot.

Ol i wokabaut long samting olsem 3-klok long apinun taim san i stap antap na hat yet tasol ol i no pret. Ol mekim save paitim gita na singsing na wokabaut.

Polis kar i go pas long ol long dispela yut mas we i kamap pastaim long ol i go opim 2021 Katolik yut rali long Alexishafen.

Planti ol Katolik yut grup memba em ol sumatin husat i bin go long Alexishafen yut rali bikos em i skul holide.

Dispela 2021 Katolik yut rali insait long Madang dineri em peris long Alexishafen i lukautim bilong dispela yia na i lukim ol yut i kam long planti ol arapela Katolik peris long Madang olsem long Usino-Bundi, Raikos na Sumkar distrik long stap na harim ol Kristen skul toktok.

Madang Asdaiosis Katolik Edukesen Ejensi Asisten Seketeri, Otto Khon i tokim Wantok Niuspepa olsem Alexishafen olsem em i gat bikpela histori long Katolik Sios long Papua Niugini na dispela yut rali em i spesel bikos em bai opim tingting bilong ol yangpela manmeri long save long wanem samting em sakrifais na wanem ol gutpela stia tok o edvais ol inap bihainim long wokabaut long laip bilong ol.

Mista Khon i tok dispela yut rali long Alexishafen em  bilong ol Madang Dineri yut na dispela i karamapim ol yut bilong Saidor peris, Walium, Gusap, Brahman, Bundi, Jomba, Holi Spirit, Alexishafen, Alopa, Rempi, Mugil, Megiar na Mirap peris.

Dispela 2021 yut rali  i kamap long taim bilong skul holide na em i moa gutpela long ol sumatin i bung long serim tok bilong God na harim ol gutpela toktok ol Katolik pater, brude na sista i serim we i toktok long gutpela Kristen laip.

Em i tok nau long dispela taim we i lukim teknolojikol edvensmen o nupela samting i kamap long sait long kompyuta na mobail fon na ol arapela samting, planti ol yut long taun na long rurel eria i no moa luksave long gutpela wokabaut insait long Kristen laip.

Olsem na kain bung olsem em i gutpela long stiaim ol yangpela manmeri bilong tude long redim ol yet gut long sanap strong long Tok bilong God.

James G. Kila i raitim