God i save wari long yupela. Olsem na olgeta hevi yupela i karim, yupela i mas putim long han bilong en (1 Pita 5:7).

Nau yumi laik harim stori bilong wanpela rabisman. Wanpela de san i hat tru na rabisman i karim wanpela hevi bilum na i wokabaut isi isi tru arere long rot bilong kar. I no long taim na wanpela kar i stop klostu long em . Na Draiva i tokim em long putim hevi bilum long kar na em yet tu. Rabisman i amamas tru na kwiktaim em rausim bilum bilong em na putim long kar na e mi sindaun. Tasol em kisim bilum gen na karim yet taim kar i ran. Em i no stap fri long kar.

Liklik taim bihain draiva i lukluk long glas na i lukim rabisman i karim bilum yet long baksait bilong em. Em i no putim long kar na stap fri. Draiva i askim, “Olsem wanem na yu karim bilum yet? Moabeta yu rausim na putim go daun long kar.”

Man i lukluk long draiva na i tok, “Mi amamas moa yet long yu kisim mi bai mi no mas wokabaut, tasol mi no laik putim bilum long kar na givim narapela hevi long yu. Mi yet i ken karim bilum bilong mi.”

Ating dispela stori em fani liklik long tingting bilong yumi. Tasol nogut em piksa bilong laip bilong yumi yet. Long dispela graun i gat kainkain hevi na wari pulap long laip bilong yumi wan wan. Olsem na Bikpela Papa God i wokim heven na graun em yet i tok long yumi ken putim olgeta hevi long han bilong em. Jisas i tok long Matyu 6:25-26, “Olsem na mi tokim yupela, yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting? Na yupela i no ken tingting planti long bodi bilong yupela na tok, ‘Bai yumi pasim wanem laplap?’ Ating laip em i winim kaikai na bodi em i winim ol laplap samting. Yupela lukim ol pisin. Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long Heven em i save givim kaikai long ol . Ating yupela ino winim tru ol pisin a?”

Planti hap bilong Buk Baibel i gat tok olsem long gutpela pasin bilong God. Papa God i save laikim tumas, Jon 3:16. Wari tumas, 1 Pita 5:7, tingting tumas, Buk Song 8:4, 144:3, Amamas tumas long ol manmeri i prêt long em, Buk Song 147:10. Wari bilong God long laip  bilong yumi i winim wari bilong em long ol pisin. Olsem na yumi no ken larim ol kainkain hevi na wari i paulim yumi. Oltaim yumi laik putim dispela hevi na wari long strongpela han bilong Papa God na stap bel isi.