PATER Joseph Durero  SVD, husat  Pop Francis i makim pinis olsem nupela Asbisop bilong Daru-Kiunga Asdaiosis long Westen provins i selebretim las misa bilong em long Madang provins long Tabel Peris long Karkar ailan wantaim ol pipel na skul komyuniti long hap.

Asbisop bilong Madang, Anton Bal i bin askim Pater Joseph Iong go long Karkar ailan long selebretim misa wantaim ol tisa bilong Divine Mercy Tabel Peris long Karkar Ailan pastaim long em i go long Mosbi long konprens bilong Katolik Bisop Konprens (CBC).

Odinesen bilong Pater Joseph i no kamap yet tasol planti Katolik Kristen manmeri bilong Madang i redi pinis long bringim dispela ‘mangi Madang’ i go long Daru-Kiunga Asdaiosis long witnesim odinesen bilong em olsem asbisop bilong Westen provins.

Asisten Seketeri bilong Katolik Edukesen long Madang Asdaiosis, Otto Khon, husat i bin go wantaim em long Tabel i tok olsem Vikar Jeneral Pater Joseph i bin bungim tu ol tisa, papamama na ol bod ov menesmen (BOM) bilong skul long harim belhevi na wari bilong ol manmeri.

Apoinmen bilong Pater Joseph olsem Asbisop bilong Daru-Kiunga em namba wan wok misin em bai mekim ausait long Madang provins.

Stori bilong Pater Joseph (SVD) em naispela stori stret. Bihain long odinesen bilong em olsem pater long kantri bilong em long Filipins, Pater Joseph i makim Papua Niugini na Madang provins  long kam mekim wok misin bilong em.

Mama i karim Joseph Durero long Epril 13, 1969.

Em i mekim fainel promis bilong em long Me 25, 1995 olsem pris bilong Sosaiti ov Divain Wod (SVD) na i lusim kantri bilong em  long Filipins na i kam long PNG na i stap sevim ol Katolik Kristen manmeri na pikinini long Madang provins inap dispela yia.

Long namba wan posting bilong em Pater Joseph i bin go stap long Holi Triniti Peris long Bogia olsem asisten peris pris, na bihain em i go long Tangu peris long Bogia yet na sevim ol pipel olsem peris pris long hap. Bihain long Tangu peris Madang Asdaiosis i salim em i go stap olsem seplin bilong Malala Katolik Sekenderi skul na bihain em i go stap long Santu Therese Ulingan Peris.

Bihain long Ulingan Pater Joseph i bin go stap long Santu Paul Mirap Peris long Sumkar distrik we em i stap olsem 7-pela yia olgeta. Bihain long Mirap Peris Pater Joseph i bin go long Madang taun na stap long Our Lady of Perpetual Help Jomba Peris we em i sevim ol Kristen pipel long hap narapela 7-pela yia.

Las posting bilong Pater Joseph em olsem peris pris long Holi Spirit Katedral long Madang taun na tu em i stap olsem vika jeneral tripela yia.

Planti ol Katolik Kristen manmeri long Madang provins husat Pater Joseph i bin givim taim na sevim ol olsem peris pris i sore olsem em bai lusim Madang na go, tasol ol i amamas tu long bikpela luksave na wok Pop Francis i givim em.

James G. Kila i raitim