I gat wanpela papa, em i marit na i gat tripela pikinini. Tasol em i bungim planti hevi olgeta taim long marit na famili laip bilong em olgeta de.

Em i pilim les olgeta long dispela kain wari na hevi. Tasol em i laik bai hevi na wari bilong famili bilong em i mas pinis bai em i ken sindaun gut na amamas wantaim meri na pikinini bilong em.

Olsem na wanpela de em i go lukim Rabai long askim helpim. Taim em i kamap long ples bilong Rabai, em i autim olgeta hevi na wari bilong em. Rabai i putim yau na harim tasol. Bihain Rabai i tokim em olsem, olgeta wari na hevi bilong em inap pinis wantaim wanpela glas wara. Em i mas bringim wanpela glas i gat kol wara, bai Rabai i blesim na em i bai dring na wasim olgeta wari na hevi bilong em.

Taim em i harim dispela tok, papa ya i tanim na givim siksti i go long haus bilong em. Tasol Rabai i singaut na tokim em olsem; Mi no askim yu go kisim wara long haus bilong yu. Yu kam na bai mi soim yu long wanem hap yu bai kisim wara long glas na bringim i kam.

Rabai i tokim em; bai yu go bek long ples bilong yu na yu tingim famili long ples bilong yu i save stap amamas tasol, i no save bungim hevi na wari. Bai yu askim ol long givim yu wanpela glas wara na bringim i kam bai mi blesim na yu dring.

Papa i tingim na em i painim sampela famili long ples bilong em na em i go na lukim ol. Long namba wan famili, em i go insait long haus na tokim ol long wanem misin. Taim em i autim pinis misin bilong em, em i sindaun na harim stori bilong hevi na wari dispela famili i bungim. Olsem na bihain, em i no kisim wara, bikos olgeta famili i gat wari na hevi bilong ol yet.

Em i lusim namba wan famili na i go long narapela famili. Sampela  i tok olsem planti famili i nogat problem, hevi na wari. Em i no tru. Bikos olgeta famili i gat problem na wari bilong ol yet. Planti bilong dispela famili i tingim olsem ol i gutpela famili, em i painim aut olsem wari na hevi o problem bilong ol i winim wari na hevi bilong em. Olsem na em i no kisim wanpela glas wara long famili bilong ol.

San i go daun pinis, na em i go bek long Rabai na tokim Rabai olsem; mi nogat interes moa long wanpela glas wara. Olgeta gutpela famili mi tingim olsem ol i save stap fri na nogat hevi, wari na problem.  Olgeta i gat hevi na wari bilong ol tu. Sampela wari bilong ol i bikpela tru, i winim wari bilong mi na sampela i wankain olsem hevi bilong em. Olgeta famili i gat wari. I nogat wanpela i nogat wari na hevi. Olsem na mi no wari long stretim wari bilong mi wantaim wanpela glas wara moa. Moabeta mi go bek long ples na painim rot bilong helpim narapela famili long stretim wari na problem bilong ol, bai mipela i ken stap gut na amamas.

Tupela wik i go pinis nau, Sande Lotu bilong Katolik sios, mipela i ritim stori bilong Jesus i kalap long wanpela bot na i go long hapsait bilong raun wara Tiberias. Namel long wokabaut bilong ol, bikpela traim i kamap long bot bilong ol. Em i bungim bikpela klaut i pairap na solwara i bikhet.

Sampela taim pinis na ol i kirapim Jisas long tokim solwara na strongpela win long stop. Pastaim ol i tram long yusim save bilong ol long stretim bikpela win na bikpela solwara.

Olsem na, no ken lusim tingting, Jisas (God) i stap wantaim yumi. Sapos bikpela hevi na trabel i kamap, no ken ranawe na painim glas man o puripuri. Go na kirapim Jisas. Em i bai mekim solwara i nogat nois moa. Jisas tasol bai givim amamas.