OL Katolik Bisop long Papua Niugini na Solomon Ailan i holim namba 62 Enuel Jenerel Konprens bilong ol long Pot Mosbi stat las wik na i pinis asde Trinde.

Ol 15 bisop na tripela nupela bisop ol i makim pinis na tupela daiosis edministreta i bin stap long dispela bung. Namel long ol bisop, sekreteri bilong Apostolik Nunsio, Pater Jacek Pinocy tu i stap.

Wantaim hevi bilong COVID-19 ol bisop bilong Solomon Ailan i no bin inap long kam long dispela bung.

Dispela konprens i bihainim bikpela mama tingting bilong “Katolik Leiti bilong yumi: Kamap Holi na go aut long sevis”.

 Insait long dispela konprens ol wan wan bisop i givim ripot bilong ol wok ol i mekim long ol daiosis bilong ol. Dispela ol ripot I sanap antap long ol tingting bilong Kristen fomesen, misin na integral human divelopmen.

Long Fraide ol bisop i holim wanpela Misa long tok gutbai long wanwok bilong ol Bisop William Fey bipo bisop bilong Kimbe husat i bin dai long COVID-19 long ples bilong em long Amerika long Janueri dispela yia. Em i bin stap bisop bilong Kimbe stat long 2010.

Long las Sande ol bisop i go aut long ol Katolik peris long Pot Mosbi na lotu wantaim ol.

Namel long ol visita husat I bin kam bung wantaim ol bisop em Minista bilong Spots na Haia Edukesen Saiens Risets na Teknoloji Wesley Raminai.