LONG Salesian Mission De long 4 Jun, Don Bosco i tokaut long wanpela projek ol i kolim Project Scraper.

Dispela projek em i bilong helpim skul long mekim wanpela nupela klasrum na tu long baim ol masin bilong Salesian Center we ol Caritas Sisters i save ranim long Saut Sudan long Afrika.

Scraper o skrap bilong kokonas em wanpela tul olgeta haus long PNG i mas gat. Ol sumatin i laik kamapim mani inap long mak bilong K10,000 long taim ol i salim wanpela skrap long K50.

Pater Pedro Sachitula, Rekta bilong ol i tok olgeta pasta na asosiesen bilong Salesian Cooperators bai wok wantaim ol sumatin long dispela projek.

Em i tok, “Yumi kisim strong na wok olsem ol famili na komyuniti.” Na emm i tokim ol student long wok bung wantaim wanpela na narapela.

Em i tok moa,“Yumi gat wanpela papa na yumi mas stap olsem wanpela famili tasol.”

Dispela projek em i hap wok bilong skul long helpim Salesian Mission Day aninit long hettok One Father, One Family.

Ol narapela fanresing olsem rafel  dro, bingo na fanresing bai i kamap long Jun i go inap long Oktoba 2021.