ALOTAU Katolik Daiosis long Milen Be i gat tupela nupela diakon.

Dispela tupela man em Japhet Kemali na Thaddeus B’Gaiva.

Bisop Rolando Santos, SDB, i givim odinesen long tupela bruder long 6 Jun.

Kemali na B’Gaiva i pinisim 6-pela skul yia long Katolik Tiolojikel Institut long Bomana, ausait long Pot Mosbi.

Long ol 6-pela yia, ol i bin skul long Filosofi (Philosophy) long tripela yia na narapela tripela em ol i skul long Tioloji (Theology).

Em i askim tupela brata long ol i mas pre olgeta taim long Bikpela na givim sevis long ol pipel bilong God.

Gutnius bilong Santu Luk 5:1-11 “….Yu no ken pret. Nau yu wok long kisim pis, tasol bihain bai yu wok long kisim ol manmeri i kam long mi.”

Bisop Ronaldo i tokim ol olsem ol i kisim strong pinis na ol i mas stap helpman bilong ol pater.

Em i tokim ol olsem ol i mas “Tis long wanem samting ol i rit, rit long wanem samting ol bilip na bilip long wanem tok ol i tis.”

Bihainim rit long Gutnius we Jisas i lukim planti lain manmeri i kam long em na em i sori long ol na i tok, “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en,” Matyu 9: 36-38.

Em i amamas long Japhet na Thaddeus long kisim singaut na ol i mas mekim wok na givim biknem long God Antap.

Ol pater, bruder, sista, famili na ol arapela manmeri i kamap na lukim odinesen bilong tupela diakon.