EMBASI i makim Pop long Papua Niugini, i tokaut long nupela helpim bisop bilong Wabag Katolik Daiosis long las wik.

Apostolik Nunsio, Reveren Fermin Emilio Sosa Rodriquez, i tokaut olsem Fr Justin Ain Soongie nau i nupela helpim bisop bilong Wabag Daiosis.

Em bai helpim Bisop Arnold Orowae husat i bisop bilong Wabag.

Pater Justin i no longtaim i go pinis long 2 June i bin amamasim 48 yia mama i karim em. Em i bilong Tsikiro long Wabag distrik.

Em i statim skul pater long 1993 we em i mekim novisiet wantaim ol Charity bruder na bihain i kisim tri-yia filisofi (Philosophy) skul long Good Shepherd Seminari long Fatima, Banz long Jiwaka na narapela tripela yia i skul Tioloji.

Em i kisim odinesen bilong kamap pater long 2005.

Namel long 2011 na 2014 em i skul long Pontifikal Yunivesiti Urbaniana long Rom.

Long 2014 em i stap peris pater long Sari na long wankain taim i stap Vika Jeneral bilong Wabag Daiosis.

Long dispela yia em i kamap Vika Jeneral na long dispela mun, Pop Francis i makim em olsem helpim bisop bilong Wabag daiosis.